Maguindanao lubog na sa baha; ARMM nasa red alert

 Maging ang Kidapawan City sa North Cotabato ay binabayo na rin ng malakas na ulan. (Kuha ni Geonarri Solmerano)

MAGUINDANAO – Abala kahapon ang mga miyembro ng Humanitarian Emergency Action and Response Team o HEART ng Autonomous Region in Muslim Mindanao o ARMM sa pagtugon sa tulong na hinihingi ng mga residente sa lalawigan ng Maguindanao matapos na umapaw ang ilog doon at malubog ang maraming lugar dahil sa walang tigil na buhos ng malakas na ulan. 

Nasa mataas na alerto na rin ang HEART matapos na ipag-utos ni ARMM Gov. Mujiv Hataman ang puspusang paghahanda laban sa kalamidad dahil sa pagpasok ng bagyong Hanna na lalong nagpalakas ng ulan sanhi ng inter-tropical convergence zone sa malaking bahagi ng Mindanao. 

Sa Datu Piang sa Maguindanao ay tuluyan ng nilamon ng ilog ang mga sakahan doon at nag-ikot na rin ang HEART rescue teams sa bayan ng Datu Montawal at N. Kabuntalan at iba pang lugar upang masigurong ligtas ang mga mamamayan.  

Mahigit isang dosenang bayan sa Maguindanao ang apektado ng baha.Maging ang mga paaralan ay lubog na rin sa tubig.Sinabi ni Hataman na inihahanda na nila ang mga relief goods at medical services kung sakaling kailanganin ito. 

Ayona naman kay Myrna Jo Henry, ng HEART, ay nasa red alert status na ngayon sila dahil sa mga pagbaha sa ibat-ibang lugar. Kasama si Henry sa mga nag-ikot sa Maguindanao upang matignan ang sitwasyon sa lalawigan. 

“On Code Red status na kami ngayon. All ARMM HEART Rescue and Response Teams (are) on 24/7 stand-by at activated na ang Operations Center,” ani Henry. 

Sa Cotabato City na siyang kinaroroonan ng ARMM Compound ay baha na rin at suspindido na ang mga klase doon. 

Sa kabila naman ng paghahanda ng ARMM at palagi na lamang ganito ang sitwasyon doon sa tuwing may malakas na ulan o bagyo at libo-libong pamilya ang siyang nahihirapan sa kalamidad. (Mindanao Examiner)

Like Us on Facebook: https://www.facebook.com/mindanaoexaminer
Follow Us on Twitter: https://twitter.com/MindanaoExamine
Read Our News on: http://www.mindanaoexaminer.com / http://mindanaoexaminernewspaper.blogspot.com/
Share The News