KANUNAY KONG matingala ngano ug unsay atong nahimo isip nasud nga mora man hinoon ta og gimaldisyon sa kahitas-an sa porma nga nabuktot ta og pinas-an sa Kamara de Representante diin ang mga pahong-pahong sa politika ug gutom nga mga irong buang mao ang naghari ug nagkarambola kun unsaon paggahin sa kita sa atong mga buhis, para aAsa unsa ug para kang kinsa apil sila.
Naa sab tay Bise Presidente, si Leni Robredo, nga nagtuo nga ang salapi para sa pagkalot sa kasapaan nga puno na og lapok aron di mokalit og baha ug landslide sama sa nahitabo sa Bicol nga iyang pinuy-anan pwede lang kuotkuoton gikan sa panudlanan sa gobyerrno. Kada yawit niya, iya lang gipadayag ang sulod sa iyang bagulbagol. Naa pay laing klase, si Kongresista Edcel Lagman, gikan gihapon sa iyang rehiyon, nga nagainsister nga ang Martial Law sa Mindanao di angay nga lugwayan tungod kay wa may armadong pag-alsa sa rehiyon. Nganong magpataka man siya og hukom og unsay maayo para sa Mindanao nga segurado ko wa gyud ni siya kataak dinhi sa ato sa Mindanao tungod sa katalaw?
Ug naa pa gyuy usa ka Bicolano, si Rolando Andaya, ang bag-ong Majority Floor Leader, nga di gyud matarog gikan sa iyang pagyaka sa gipropose nga budget sa 2019 tungod sa gialegar niya nga pag-insert kuno og mga item sa budget ni Sec. Benjamin Diokno. Kini nga pagyaka sa badyet makadaot sa unang yugto sa programang Build Build Build sa administrasyong Duterte.
Si Sen. Antonio Trillanes gikan sab sa rehiyon. Wa siya sa nasud karon kay kuno duna siyay sunodsunod nga pakigpulong gawas sa nasud. Dinhi sa Pilipinas, nag-atubang siya og nagbukalbukal nga mga warrant apan gusto pa gihapon niya nga mangilad ug patuhoon tang yanong lungsoranon nga kuno siya mora og si Dale Carnegie ug kining maong ilusyon gihatagan niya kunohay og kinabuhi pinaagi sa pagdiskurso atubangan sa pilipila ka gagmay nga tapok imbes moatubang sa korte aron tubagon ang mga kaso kriminal nga gisang-at batok kaniya. Gahapon didto siya sa Amsterdam ug sunod adlaw sa London diin ang way kahadlok nga brodkaster sa BBC, si Stephen Sackur, ningkomentaryo kaniadto sa iyang atubangan nga siya tulibag ug sintonado. Posible kaha nga ang epekto sa aso ug abo nga gibuga kanunay sa aktibong bulkang Mayon ningsaka sa ilang utok?
Grabe ka seryoso ang talagsaonng hitabo sa pagkadelatar sa badyet para sa tuig 2019. Kun ang mga “pagpangsal-ot” gihimo, nganong di sila kahimo og hukom kun duna bay balidong rason nganong iapil o dili. Hinumdomi nga daghang distrito gitanggalan og alokasyon sa badyet sa termino ni kanhi Speaker Bebot Alvarez.
Sayo pa nakita na ni Kongresista Andaya ang dagkong bulto sa badyet nga gigahin sa distrito ni Alvarez, Kongresista Rodolfo Farinas ug kanhi Kongresista ug karon Cabinet Sec. Karlo Nograles. Ang problema niadto kay ang Malacanang nagkwestyon sa gisuspetsahan nga dako nga alokasyon para sa distrito ni Speaker Gloria Macapagal Arroyo, apan ninglabas nga gamatoy ra diay kaayo kun itandi sa alokasyon sa tulo. Gubot pa sa lukot ang Balay ni Gloria ug paralisado kini tungod kay dili kadesisyon kun unsay buhaton sa badyet sa 2019.
Kinahanglan nga ibutyag sa Kongreso ang ilang gisuspetsahan nga gipangsal-ot ug ipursige sa iyang ginsakopan ang makiangayon ug makatarunganong badyet. Maayo na unta kay ilang giimbita si Budget Sec. Ben Diokno sa budget hearing apan imbes mangita og katin-awan bahin sa badyet, gilansang hinoon siya sa mga kongresista sa krus ug gilumsan sa nagbaha nga mga insulto.
Ang kapakyasan sa pag-aprub sa badyet moresulta sa paghunong sa trabaho sa gobyerno ug pagkadelatar sa pag-implementar sa pagpataas sa sweldo sa mga trabhhante sa gobyerno. Basin baya og ang nagakagrabe nga kahimtang mopwersa kang Pres. Rodrigo Duterte nga mohunahuna og mga opsyon nga mosangko sa pagmahay sa mga kongresista sa umaabot nga panahon. (Jun Ledesma)
Like Us on Facebook: https://www.facebook.com/mindanaoexaminer
Follow Us on Twitter: https://twitter.com/MindanaoExamine
Read And Share Our News: https://www.mindanaoexaminer.com
Mirror Site: https://mindanaoexaminernewspaper.blogspot.com
Digital Archives: https://issuu.com/mindanaoexaminernewspaper
See Media Rates: https://mindanaoexaminer.com/ad-rates
No comments:
Post a Comment