NPA sa MisOr nisurrender tungod sa kagutom og kalisod sa kinabuhi

SI ALIAS Dino, usa sa tulo ka membro sa New People’s Army nga nisurender sa 58th Infantry Battalion sa Claveria Misamis Oriental namahayag nga ang kagutom ug kalisod sa kinabuhi sa pagdagan ug tago sa kabukiran alang sa way pulos nga idolohiya mauy nakapa-aghat kaniya mga mubalik sa sabakan sa balaod.    

Matod ni Dino, nailad sila sa dihang giimbitahan sila sa grupo walo na ka tuig ang nakalabay. Giingon sa mga lider didto nga ang NPA mao ang sakto nga gobyerno, usa ka gobyerno alang sa mga kabus. Gisultihan sila nga adunay kaangayan ug managsama lamang ang tanan, apan ang tanan kakawangan. 

Ang ilang kinabuhi nahimong hilabihan ka lisud matag adlaw. Busa giawhag niya ang uban pang mga membro sa NPA nga manaog ug mubalik sa gobyerno.

"Dako kaayu ang among pasalamat nga gidawat kami'g balik sa gobyerno. Wala gyud mi pasakiti bisan gamay sukwahi sa giingon sa maong mga kaubang rebelde nga kon mubalik kamo sa gobyerno, patyon mo sa mga sundalo ug ang mga babaye, lugoson. Ug nakita nako karon nga kadtung tanan nga ilang giingon, dili tinuod, pamahayag ni Dino. 

"Ayaw namo pag agwanta dinha, grabe ka gutom dinha. Undang na mo nianang pakigbisug nga way kapuslanan. Balik namo sa gobyerno. Naa diri ang inyong kaugmaon ug para sa atong mga anak ug sa muabot mga kabataan. Ayaw mo og kawili dinha," dugang pa ni Dino.

Samtang, si LTC Ricky L. Canatoy, commanding officer sa 58th Infantry Battalion miingon nga kini usa ka bag-ong sinugdanan sa atong mga kaigsoonan nga mibalik sa gobyerno.

Ang nasudnong ug lokal nga kagamhanan naghatag sa hingpit nga suporta sa mg NPA nga ni-surrender ug mibalig sa sabakan sa balaod.

Ang regional, provincial, municipal ug bisan ang Barangay Task Force alang sa pag-tapus sa kagubot sa walhung komunista naghatag suporta pinaagi sa Enhanced - Comprehensive Local Integration Program (E-CLIP) diin adunay mga firearms renumeration, panginabuhian ug uban pang suporta gikan sa nagkalain-laing mga buhatan sa gobyerno.

Ang 58th Infantry Battalion, matud pa ni Canatoy, kanunay abli sa pagdawat sa NPA nga mo-surrender ug mubalik sa gobyerno. (By Vincent Philip S. Bautista)