Boat registration, fishing gear licensing ipahigayon

DIPOLOG CITY - Gikatakdang ipahigayon na usab ang tinuig nga “mobile boat registration and fishing gear licensing”  dinhi sa dakbayan sugod karong umaabot Enero 11 nga molungtad handtud sa Pebrero 18 ning tuiga.

Mao kini ang kalamboan nga nasayran gikan sa lokal nga buhatan sa City Agriculture Office pinaagi ni Agriculturist Engr. Kerr Porlas. Sumala pa nga kining maong tinuig nga kalihokan ang dinha ipahigayon sa unom ka mga coastal barangays nga gilangkoban sa mga barangay sa Olingan, Galas, Miputak, Barra, Minaog ug Sicayab. 

Dugang ni Porlas, nga sama sa gihapon, kining maong kalihokan ang dinha ra gihapon ipahigayon sa nasangpit nga mga barangay, partikular dinha sa mga barangay hall, aron dili na mogasto pa sa pamasahe ang atong mga kaigsoonang banca owners / operators alang ning maong katuyu-an. 

Dugang gipasabot sa tinubdang buhatan nga kining maong kalihokan maoy obligasyon sa atong mga kaigsoonang nanag-iya og mga bangkang panagatan, bugti sa ilang pagpanag-iya sa maong panginabuhian nga gitakda sa atong balaod. 

Sama sa gihapon, ang mga nag-unang rekesitos nga gikinahanglan mao ang: Barangay clearance, cedula sa tag-iya, balidong ID, photocopy o printed copy sa hulagway sa mga mosunod: (gitakda sa Maritime), kinatibuk-ang bangkang panagat, engine number sa bangka, ug 2 ka buok 2 x 2 ID photo (hulagway sa tag-iya). 

Subay sa pagpahigayon ning maong kalihokan, gi-awhagan kadtong nanag-iya og mga bangkang panagat sa pagpahimulos ning maong tinuig nga kalihokan pinaagi sa pag-andam na sa ilang mga rekesitos alang sa pagparehistro, aron dili sila kamultahan bunga sa kapakyas unya sa pagparehistro sa ilang mga bangka. Alang sa dugang inpormasyon mahimo silang magpakisayod lang didto sa ilang Barangay Hall, kalabot niini. (AFB)