PAGADIAN CITY – Nakumpiska sa gipahigayong search and seizure operation karon semana ang P544,000 nga kantidad sa iligal nga droga gikan sa usa ka inmate sulod mismo sa Zamboanga del Sur Provincial Jail sa Barangay San Jose sa Pagadian City.
Nasayran nga sa wala pa gilusad ang operasyon, nakig-meeting una kang Governor Victor Yu ang mga operatiba sa Philippine Drug Enforcement Agency ug Zamboanga del Sur Police Provincial Office diin mihatag gilayon og ‘go signal’ ang gobernador sa raiding team nga miresulta sa pagkasikop sa usa ka drug personality sulod sa bilangguan.
Si Col. Ruel Lami-ing, ang police provincial director, nagkanayon nga motimbang sa 80 gramos sa gituhoang shabu ang nakuha gikan sa usa ka Danilo B. Martinito, 45 anyos, dunay kasong gun-running ug miembro sa nabaniog nga Alferez criminal gang sa Ozamiz City sa Misamis Occidental.
Pagsaysay ni Lami-ing nga ang nahitabong surprise inspection sa provincial jail usa ka follow-up operation sa nahitabong pagkasakmit sa 39 gramos nga shabu sa usa ka drug personality sa Pagadian City.
Nasayran sa imbestigasyon nga pareho og supplier sa droga ang mga nadakpan.
Pagpaambit ni Lami-ing nga mipasalig si Yu nga dili konsentihon ang iligal nga aktibidad sa bilangguan og nga walay mahitabong ‘white wash’ sa pagahimuong imbestigasyon.
Gipadayag usab niya ang pagahimuong lakang sa kapulisan ilawom sa iyang pagdumala labot sa pagkakumpiska sa illegal drugs sulod mismo sa bilangguan. “We need to double time our efforts, sa law enforcement natin together with the provincial jail and other jail facilities. We will coordinate with the jail wardens so that we can conduct Oplan Galugad on regular basis,” pahayag ni Lami-ing.
Gidugang usab sa police provincial director nga maghimo sila og separate investigation aron masuta kung dunay kalambigitan ang mga jail personnel sa pagpasulod sa ginadiling droga sa provincial jail.
Sumala ni PDEA Provincial Director Cesario Judilla, daling miangkon ang detainee nga si Martinito nga gilubong niya sa yuta ang drogang shabu. Mag-atubang siya sa kasong paglapas sa Section 5 sa Article 2 Republic Act 9165 kun Comprehensive Dangerous Drugs Act of 2002.
Samtang gikonsiderang isolated case
ni Jail Warden Joey Villanosa ang nadiskubreng shabu sa presohan nga gipaagi
matud pa sa usa ka package delivery pasulod sa pasilidad. Maghimo usab sila og
kaugalingong imbestigasyon labot sa nakalusot nga droga sa Zamboanga del Sur
Provincial Jail. (ZDS/PPB)
Like Us on Facebook: The Mindanao Examiner
Like Us on Facebook: The Zamboanga Post
Follow Us on Twitter: Mindanao Examine
Mirror Site: Mindanao Examiner Blog
Digital Archives: Mindanao Examiner Digital
Media Rates: Advertising Rates
No comments:
Post a Comment