Polyeto kontra Covid, bakuna

NIHATAG OG katin-awan ang Department of Health (DOH) kalabot sa nikatap nga polyeto sa social media nga nag-ingon nga dili tinuod ang Covid-19 ug dili luwas ang mga bakuna.

Matud pa sa DOH nga ang Covid-19 makatakod ug makaingon sa grabeng sakit nga nahimong hinungdan sa pagkamatay sa daghang mga tawo sa tibuok kalibotan sulod lamang sa usa ka tuig ug unom ka buwan. Dugang pa sa ahensya nga ang Covid-19 gideklarar sa World Health Organization (WHO) isip usa  ka global pandemic.

Kusganong gipahinumdom sa DOH nga ang mga bakuna niagi sa makuting pagtuon sa Vaccine Expert Panel ug nahatagan og Emergency Use Authorization sa Food and Drugs Administration nga luwas ug epektibo.

Giklaro usab sa ahensya nga walay kamatuoran nga ang pagpabakuna makamatay o makaapekto sa kinatibuk-ang panglawas sa tawo.  Ang mga bakuna wala usab sulod nga mga sangkap sa Genetically Modified Organisms o aborted cells. 

Subling gipahinumdom sa DOH nga ang paggamit og face mask ug shield makatabang aron dili matakdan sa virus. Gipahinumdoman sa departamento ang publiko nga kanunay e-beripika ang mga impormasyon nga makita online sa mga lehitimong tinubdan lamang. (Elvira Bongosia)