Mga asawa pwede na unyang di magamit sa apelyido sa ilang bana

PAGADIAN CITY - Aprobado na sa Ubos Balay Balay-oranan ang balaodnon nga naghatag og kagawasan sa mga asawa nga dili ganahan mugamit sa apelyido sa ilang bana ug ipagtibabaw ang iyang pangalan ug apelyido sa pagkadalaga.

Kini human nga gipaboran sa 277 ka mga kongresista ang House Bill No. 10456 sa ikatulo og katapusang pagbasa. Hinoon, ipasa pa sa Senado ang aprobadong balaodnon aron tukion ug susamang aprobahan sa dili pa kini ipasa sa Presidente aron iyang pirmahan ug hingpit nang mahimong balaod. 

Ubos sa Article 370 sa atong Civil Code ang mga babayeng maminyo adunay tulo ka pagpilian sa pagamit sa apelyido sa ilang bana. Una, pwede nga ang asawa mugamit sa iyang pangalan ug apelyido sa pagkadalaga unya idugang ang apelyido sa iyang bana. 

Ikaduha, pwede nga pangan sa babaye unya apelyido sa iyang bana ug ang ikatulo, mao ang pagamit sa kompletong pangan sa bana apan butangan ug Mrs. 

Kung hingpit na unyang kining mahimong balaod mao na unya kini ang ikaupat nga papilian sa mga babaye magminyo ilabi na niadtong gusto gamiton ang ilang apelyido sa pagkadalaga. (Atty. Juril Broka Patiño)