Dipolog enumerators i-deploy alang sa census

GITAKDANG I-DEPLOY karon ang 75 ka mga enumerators sa kagamhanang lokal sa Dipolog nga mopahigayon ug Household Profile Census sa tanang mga kabaranggayan nga sakop ning dakbayan.

Tumong ning nasangpit nga census mao ang pagkuha sa mga datus nga gikinahanglan sa kagamhanan aron kini gamiton alang na sa pagplano sa mga programang makahatag og dugang kalamboan sa matag barangay ug aron usab masayran ang mga problema ug kinahanglanon sa mga lumulopyo aron mahatagan kini sa tukmang mga solusyon. 

Ang mga enumerators molangkob sa usa ka team nga dunay usa ka team leader ug lima ka membro nga maoy mobisita sa matag panimalay aron ma-profile ang ilang ekonomikanhong sitwasyon.

Kining maong pamaagi makatabang dinha sa sayon nga pag-ila kon kinsa kadtong pamilya ang wala pa makapahimulos sa mga programa sa gobyerno nga naghatag ug subsidiya o mga benipisyo nga angayan nilang madawat. 

Gi-awhag sa kagamhanang lokal sa Dipolog sa pagdumala ni Mayor Darel Dexter Uy ang mga lumulopyo sa mga kabaranggayan nga mo-koordinar sa mga enumerators kon kini mobisita sa ilang tagsa-tagsa ka panimalay ug ihatag ang insaktong inpormasyon kabahin sa ilang panimuyo tungod kay kini alang man usab sa ilang kaayohan. 

Ang mga datus nga makuha, sumala pa, magpabiling nga “confidential” base usab sa Akta Republika 10173 kon Data Privacy Act of 2012. (LTD)