DILG mimando alang sa halapad nga pagsangyaw sa BARMM resolusyon

DIPOLOG CITY - Miluwat og kamandoan karon ang Department of the Interior and Local Government (DILG) ngadto sa tanang mga sangang buhatan niini dinha sa mga rehiyon, lalawigan, dakbayan ug kalungsoran alang sa pagsangyaw sa kopya sa “BARMM Resolution No. 184, kalabot sa dili pag-diskriminar ug sa pagrespeto sa kultura ug relihiyon sa atong mga kaigsoonang Muslim dinha sa pagpanarbaho ug sa paglugway sa serbisyo gikan sa mga pampublikong buhatan”

Sigun sa nasayran nga kining maong kamadoan ang giluwatan sa nahisgotang ahensiya sa unahan sa katuyu-an nga kini ang kahimoan sa halapad nga pagsangyaw isip pagsanong ngadto sa hangyo sa buhatan sa Bangsamoro Transition Authority Parliament pinaagi ni Secretary-General Professor Raby Angkal. 

Sumala pa nga gumikan sa kasinatian sa diskriminasyon sa pipila nato ka mga kaigsoonang Muslim kalabot sa pagpanarbaho o kaha dinha sa mga serbisyo gikan sa atong mga pampublikong buhatan, busa kining nahisgotang Resolution ang napanday, sa tuyong kapanalipdan ang ilang mga katungod. 

Matud pa nga lakip sa unod ning nasangpit nga resolusyon mao ang paghangyo sa tanang mga ahensiya sa gobyerno, lakip na ang pribadong sektor sulod sa BARMM sa pagwagtang sa diskriminasyon dinha sa pagpanarbo, pagtungha, pagpalit o pag-abang og mga kayutaan basi sa tinuhu-an, lakip na dinha sa pagdawat sa mga kwalipikadong trabahante nga mga sumosunod sa pagtuong Islam. 

Busa isip tubag ngadto sa maong hangyo, miluwat usab ang DILG og kamandoan alang sa tanang mga sakop nga buhatan niini dinha sa mga rehiyon dinhi sulod sa nasud alang sa paghimo sa halapad nga pagsangyaw ning maong inpormasyon alang sa kasayuran sa mga pampubliko ug pribadong sektor . (AFB)