Mayor Uy, mga kauban sa bando, gi-proklamar

DIPOLOG CITY – Si Mayor Darel Uy ug mga kauban sa bando gi-proklamar na sa City Board Of Canvassers (CBOC).

Ang maong proklamasyon ang gihimo sa ning siyudad ilawom sa pagpanguna ni City Election Officer, Atty. Edmund Rey B. Calo, kinsa maoy Chairman; uban ni City Prosecutor, Atty. Herminia C. Enero isip Vice Chairman ug City Schools Division Superintendent, Dr. Danny V. Cordova isip member. 

Ang pag-proklama nila ni Uy ug former Zamboanga del Norte Vice Governor Atty. Senen O. Angeles, kinsa midaug pagka-Bise Mayor, uban sa 10 nagpakadaug usab nga mga konsehales nga pulos ilawom sa ilang bando sa PDP-LABAN, didto sa hawanan sa Sangguniang Panlungsod.

Ang nasangpit nga pagproklama sa mga mananaug ang gihimo human gayud na pinalisar ang canvassing ilawom usab sa presensiya sa mga abogado sa matag habig ug pipila ka mga katawhan kinsa misaksi sa canvassing. 

Gawas nila ni Uy ug Angeles, giproklama usab sila si James Cyril O. Ruiz, Atty. Roger Asprer, Atty. James P. Verduguez, Atty. Jonald Napigquit, Eduardo Baron, Maynard Baes, Marilou Calibo, Praxy Rubia, Romulo Soliva ug Atty. Matoy Barinaga, isip mga bag-ong napiling konsehal ning siyudad. 

Kining maong mga bag-ong napiling opisyales dinhi sa dakbayan ang gikatakdang moserbisyo sa laing tulo ka tuig o usa ka termino nga mosugod sa paglingkod karong Hulyo 1, 2022 ug motapos sa Hunyo 30 sa tuig 2025, sigun sa gitakda sa balaod. 

Misaksi sa nasangpit nga proklamasyon mao sila si incumbent City Vice Mayor Dr. Horacio Velasco, City Councilor, Atty. Raul Barbaso, mga inilang personalidad ug opisyales gikan sa mga nagkalain-laing buhatan ug ahensiya sa kagamhanan, uban usab sa mga pamilya sa mga giproklamar nga mga mananaug. (AFB)