Zambo Sur 'Number 1' sa cigarette smuggling?

PAGADIAN CITY - Gipatin-aw sa Philippine Tobacco Institute pinaagi sa representante niini nga si Richard Paragas ang isyu nga nag-Number 1 ang Zamboanga del Sur sa cigarette smuggling sa tibuok Pilipinas.

 

Sa pakighinabi ni Provincial Information Officer Jeesrel Himang kang Paragas, gipaklaro niini ang basehan sa gipagawas nga datos sa Kantar Survey. Matud pa niya nga ang gisukod sa maong survey ang presensya sa mga smuggled cigarettes sa mga tindahan sa probinsya ilabina sa Pagadian City nga maoy center of trade ug dili ang smuggling activity nga nahitabo sa lalawigan. 

Gisaysay ni Paragas nga majority sa mga gisurvey sa Kantar mao ang mga tindahan sa Pagadian City ilabina sa Agora Public Market ug ubang barangay sa siyudad. 

Subling gipahayag ni Paragas ang pagpasalamat sa Bureau of Customs ug ang industriya sa tabako ngadto kang Gov. Victor Yu tungod sa inisyatiba niini nga momugna og usa ka Task Force nga maoy motutok sa problema sa cigarette smuggling sa lalawigan pinasikad sa Provincial Ordinance 051-2021.

Pagpasabot ni Paragas, dako ang mawala sa panudlanan sa gobyerno resulta sa iligal nga sigarilyo tungod kay wala kini magbayad og buwis nga angay untang isustinir sa mga serbisyo sa gobyerno sama sa educational ug medical services lakip na ang pag-implementar sa Universal Health Care. 

Pagpadayag sa provincial government, ang pakigkumbati kontra-smuggling dili lamang kaakuhan sa mga law enforcers apan lakip na sa matag local governments ug sa katawhan nga maoy dakong susi sa pagsulbad sa maong iligal nga binuhatan. 

Kahinumdoman nga ang Zamboanga del Sur ang usa sa nahimong ehemplo sa tibuok nasud, isip aktibong probinsya nga nakigbatok kontra cigarette smuggling.