ZANECO gidapit alang sa legislative inquiry sa Sanguniang Panlungsod

DIPOLOG CITY - Gikalatid nga ipahigayon ang usa ka legislative inquiry pinaagi sa committee hearing. Kining maong kalihokan ang tuyong gihimo pinaagi sa pagdapit sa General Manager sa Zamboanga Del Norte Electric Cooperative (ZANECO) nga si Atty. Jordanne Chan Antonio, aron sa paghatag og mga katin-awan kalabot na sa kalit nga pagsaka sa balayranan sa kuryente, ug uban pang mga concerns nga buot masayran sa atong mga katawhan.

Sumala pa nga kining maong gihimo sa Sangguniang Panlungsod sa pagpanguna ni Konsehal Roseller Barinaga maoy tubag ngadto sa tigaw sa mga katawhan partikular na kabahin sa hataas nga pag-usbaw sa balayran sa kuryente, nga sumala pa sa mga konsumante, dili makatarunganon ug nahinaykan. 

Tungod ning maong kasibaw, nangayo karon ug mga katin-awan ang mga konsumante gikan sa nahisgotang ahensiya alang sa ilang tinuod nga hinungdan. Nunot niini, nagadapit ang Sangguniang Panlungsod ning siyudad ngadto sa mga sakop sa prensa dinhi sa dakbayan sa pagtambong ning maong importanteng hearing. (AFB)