Sindangan, gitamnan sa sibuyas sa ZNAg program

DIPOLOG CITY - Aron pagtabang ug pagsuporta sa mga ZaNortehanons may kalabutan na sa pagtaas sa presyo sa sibuyas bombay, ang Office of the Provincial Agriculturist (OPAG) sa liderato ni Governor Rosalina “Nanay Nene” Jalosjos mihimo sa inisyatiba pinaagi sa Zamboanga del Norte Agricultural Extension (ZNAg) Program.

Kini mihatag ngadto sa Upper Piao Farmers Association sa 400 gramos nga liso sa sibuyas bombay sa Upper Piao sa Sindangan ning lalawigan. Ang OPAG pinaagi ni Provincial Agriculturist Maybel Bustaliño mihimo’g aksyon aron ang katawhan ning probinsya mahatagan ug supply sa sibuyas bombay sa hamubo nga presyo. 

Si Cirilo Maata, Assistant Coordinator sa ZNAg Program sa OPAG ug Carmen Putian, Farm Foreman sa nasangpit nga buhatan, mipasabot nga bisan paman sa unsa ka sinsitibo ug atimanunon pag-ayo ang sibuyas bombay, gipaningkamutan ug gitun-an pag-ayo nila kini nga magmalampuson aron adunay maani sa umaabot nga panahon.

Ang ZNAg Program mihatag sa Upper Piao Farmers Association sa Sindangan sa maong 400 gramos nga liso sa sibuyas bombay nga naila usab sa pangalan nga sibulyon o red onions. 

Sa nasayran nga sa 400 gramos nga liso sa sibuyas bombay, adunay 1,000 square meters ang luna sa yuta nga matamnan niini. Gibana-bana kini nga moani ngadto sa 900-1,000 kilos karong umaabot bulan sa Hunyo niining tuiga. 

Samtang si Bienvenido Bercasio, President sa Upper Piao Farmers Association, nagpasalamat ni Nanay Nene ug ni Bustaliño nga mihatag sa maong proyekto alang kanila nga mga mag-uuma. Sumala pa nga dako kaayo’g gikatabang kanilang mga mag-uuma ang ZNAg Program, tungod sa kalisod karong panahona. 

Nasaksihan mismo sa Provincial Information Center kung unsaon ang pag transplant sa semilya sa sibuyas bombay ngadto sa ilang tamnanan. Dugang pa nga tanan nilang mga panginahanglanon gikan sa binhi, pagtikad sa yuta, abono, mga materyales sa pag-panguma ilabi na ang makina sa tubig nga sarang magamit sa ilang garden, gihatag kini sa kagamhanang probinsyal. 

Samtang adunay 2,800 ka mga punoan sa water melon ug 1,500 ka punuan sa kalabasa ang gi-ugmad usab sa maong kahugpongan nga gikalatid nga anihon karong bulan sa Mayo. (Chariz Velasco)