DIPOLOG CITY – Ang kagamhanang lokal sa Dipolog pinaagi sa City Health Office (CHO) dinuyogan sa Department of Education (DepEd), Population Commission, Zuellig Family Foundation ug uban pang mga stakeholders ang mipahigayon sa STI-HIV/AIDS, Teen Pregnancy, Mental Health and Adolescent Reproductive Health Education Summit sa mga nagkalain-laing tulonghaan sa sekondarya ning dakbayan.
Tumong ning nasangpit nga kalihukan mao ang pag-edukar ug paghatag og kalamdagan sa mga nagtubo nga kabataan kon ugaling aduna man sila’y gi-atubang nga mental ug health issues ug uban pang mga problema nga sarang mahinagbo niini.
Gipahigayon ang culmination ning nasangpit nga aktibidad didto sa Zamboanga del Norte National High Schoo-Turno Campus (ZNNHS) diin kini gitambongan sa mga pinili nga Grade 10 students.
Atol sa gipahigayon nga hamubong programa, si konsehal Marilou Calibo, chairman sa Committee on Education and Culture ug maoy representante ni Mayor Darel Dexter Uy, ang midasig sa mga magtutungha nga mosubay gayod sa maayong dalan sa kinabuhi tungod kay ang gobyerno, partikular ang kagamhanang lokal sa Dipolog ug ang DepEd, ang nagpakabana alang sa maayong ugma sa tanang magtutungha.
Dugang niya nga importante nga mag-ampo kanunay, maningkamot dinha sa pagtuon ug maminaw sa mga tambag sa mga ginikanan aron makab-ot ang maayong ugma. Samtang si City Schools Division Superintendent Dr. Maria Liza Tabilon ang mipadayag usab sa susamang mensahe ngadto sa mga kabataan.
Nasayran nga kining maong aktibidad ang gisugdan niadtong Enero 13 ning tuiga diin kining nasangpit nga education campaign ang ginahimo matag adlaw’ng Biyernes dinha sa nagkalain-laing secondary schools nga sakop ning dakbayan ug karong adlawa gitapos kini dinha sa ZNNHS. Lakip sa mga mitambong niini mao ang mga buhatan CHO nga gipangulohan ni Dr. Benson Panaguiton, POPCOM, City Social Welfare and Development Officer Arlene Jatico ug mga magtutudlo sa nasangpit nga tulonghaan. (LTD)
No comments:
Post a Comment