Livelihood assistance aron mas mapalambo ang turismo

MALAYBALAY CITY - Isip pag-ila sa bililhong papel sa gitawag nga community-based tourism organizations (CBTOs) sa pagpalambo sa turismo, ang Department of Tourism (DOT) mihatag og livelihood assistance ngadto sa CBTOs aron makahatag kanila og dugang kahigayonan ug makapakab-ot sa pag-uswag sa industriya sa turismo sa nasud.

Usa sa mga nakadawat sa livelihood aid gikan sa DOT-Northern Mindanao, mao ang community-based mountaineering club sa munisipyo sa Manolo Fortich sa Bukidnon. 

Gitukod niadtong 2010 ug nagdasig sa usa ka lig-on nga pagpanalipod sa kinaiyahan, ang Kalasanen Mountaineering Club (KMC) naghiusa sa mga mountaineer, mga hiker, ug mga explorer, nga dunay parehas nga tumong sa pagpanalipod ug pagpreserbar sa kinaiyahan. 

Sumala sa DOT, gipili ang KMC tungod sa daghang ‘outreach’ nga mga programa nga gipasiugdahan niini aron mahatagan ang mga bata nga nagpuyo sa lagyong mga lugar sa mga school supply ug makatigom og pundo aron masuportahan ang tambal sa usa ka 64-anyos nga residente sa Manolo Fortich nga dunay Parkinson's Syndrome Disease. 

Gawas niini, ang KMC dunay mahinungdanong papel sa pagpanalipod sa Mt. Palaopao ug sa flora, fauna, ug komunidad sa palibot niini, ilabi na karon nga ang Manolo Fortich gideklarar nga Philippine Eagle Sanctuary sa Northern Mindanao human madiskobre nga naay walo ka parisan sa Philippine Eagle nga nagpuyo sa kalasangan sa munisipyo. 

Kauban ang 27 ka mga miyembro, ang mountaineering club nakadawat og Basic Mountaineering Course nga nagkantidad og P300,000 gikan sa DOT. Gihatagan usab sila og mga livelihood kits isip kabahin sa ilang training. Kini nga mga kits naglakip sa mga tent, pisi, kagamitan sa pagluto, gas stove, butane, mountain bag, compass, ug sleeping bag.

Ang ceremonial turnover sa livelihood support gihimo atol sa pagbisita ni DOT Secretary Christina Frasco sa maong lungsod aron inagurahan ang pinaka-unang Tourist Rest Area sa Northern Mindanao. 

Bisan pa og dunay napulo ka CBTO nga giila sa Manolo Fortich, ang Kalasanen Mountaineering Club mao ang unang CBTO sa lungsod nga nakadawat niining tabang gikan sa DOT. 

Ang KMC nagpabiling lig-on sa ilang pasalig nga dasigon ang katawhan sa pagsuporta sa ilang kawsa ug pagdapit ug dugang mga turista sa pagsuhid sa katahom sa Manolo Fortich pinaagi sa mga kalihokan sa pagpananom og kahoy ug panaghigalaay. (Johnson Adviento)