DIPOLOG CITY - Dako ang pagpasalamat ni Acting Provincial Administrator Wilberth Magallanes sa Ayuda Team ni Governor Rosalina “Nanay Nene” Jalosjos, sa pagpanguna ni Atty. Ivan Patrick Ang sa walay puas nga paghatag serbisyo sa katawhan sa probinsya sa Zamboanga del Norte.
Emosyonal nga gisaysay usab ni Magallanes ang iyang nasinati sa pagkuyog sa ayuda sa Sipacong ug matod pa sa Provincial Administrator, usa kini sa pinakalayo nga barangay sa iyang lungsod sa Leon B. Postigo, ug iyang nasayran nga maglisod ang mga katawhan ug adto sa hospital.
Gipasalig usab ni Magallanes nga human unya sa election ban, hayan nga mapaabot ang mga serbisyo ngadto sa hilit nga barangay ning probinsya aron ilang matagamtaman ang mga programa sa gobyerno.
Dako usab ang pagpasalamat ni Magallanes ngadto sa mitabang ug nagpaluyo sa ayuda team uban sa Sanggunian Panlalawigan, mga hepe sa buhatan sa probinsya ug sa tanang miyembro sa Local Finance Committee sa pagsuporta sa maong outreach program.
Sa laing bahin, nagkanayon si Magallanes nga tagaan usab ug higayon ang mga empleyado sa matag buhatan sa kapitolyo nga makakuyog usab sa pagpahigayon sa maong programa aron masinati nila ang pag-serbisyo sa katawhan, nga dili lamang magpundo sa upat ka suok sa opisina.
Sa pagkakaron, gihunong usa ang Outreach Program alayon sa Election Ban, apan magpadayon gihapon ang serbisyo ni Nanay Nene subay sa iyang panultihon, “Misyon ko, Tinuod nga Serbisyo”. (Rosella Aba-a, Jeffrey Lacay, Raymond Garrovillo)
No comments:
Post a Comment