‘We are working very hard’: BBM sa resulta ng survey

DAVAO CITY – Inamin ni Pangulong Ferdinand Marcos Jr na hindi ito nagulat sa pagbagsak ng kanyang popularidad sa kabila ng kahirapang dinaranas ng mga Pilipino sa kasalukuyan dahil sa patuloy na paglobo ng mga presyo ng pangunahing bilihin, partikular ang bigas.

Parehong sumadsad ang popularidad nina Marcos at Bise Pangulong Sara Duterte, ayon sa Pulse Asia Survey. Sa inilabas nitong survey kamakailan lamang, sinabi ng naturang polling organization na ang pagbagsak ng popularidad ng dalawang lider ay kasabay ng walang humpay na pagtaas ng presyo ng mga bilihin, partikular ang bigas, at iba pa pang kadahilanan.

Ayon sa Pulse Asia Survey na isinagawa noong nakaraang buwan sa 1,200 katao, bumagsak ng 15% mula 80% ang popularidad ni Marcos. Ang patuloy na pagtaas ng presyo ng mga pangunahing bilihin at ang pangako ni Marcos na tutugunan nito ang nasabing problema ang pangunahing dahilan ng pagbagsak ng popularidad nito.

Ito rin ang unang pagkakataon mula ng mahalal si Marcos na sumadsad ang kanyang popularidad. Si Marcos rin ang tumatayong Agriculture secretary sa kasalukuyan.

Ang pagsadsad naman ng popularidad ni Duterte ay natapat sa kontrobersyal na isyu ng kanyang nakakalulang confidential at intelligence funds na binabatikos sa Senado at Kongreso. Mula 84% noong Hunyo ay bumagsak ang popularidad ni Duterte sa 73%.  

“It’s not surprising. People are having a hard time,” ani Marcos.

Sinabi pa ni Marcos na hindi mahalaga sa kanya ang resulta ng survey at ang importante aniya ay ang mga hakbang na isinasagawa ng kanyang administrasyon.

“That’s why we’re working very, very hard to make sure that this comes up again, not because of the survey. That’s not important to me. What’s important to me is that we make sure that people have enough to eat and that it is affordable to them,” wika pa ni Marcos.

“I think we are slowly heading there dahil ang supply natin ay napakaganda; ang distribution siguro mayroon na tayong ginagawa doon sa pass-through para sa cost ng pag-deliver nung bigas, lalo na sa mga malalayo. NCR is included there,” dagdag pa nito.

Wala naman pahayag si Duterte ukol sa resulta ng survey. (Mindanao Examiner)