Libreng Wi-Fi sa Iligan City Public Plaza, gilusad sa DICT

ILIGAN CITY - Maka-access na ang publiko dinhi sa libreng Wi-Fi sa Rizal Park o City Public Plaza sa Barangay Poblacion ning dakbayan, human nga gilusad ang "Free Wifi for All Project" sa Department of Information and Communications Technology (DICT).

Personal nga gisaksihan ni DICT Secretary Ivan John Uy ang kalihokan, nga nagpasiugda sa pagpaningkamot sa gobyerno sa pagpauswag sa digital connectivity sa tibuok nasod.

Tumong sa proyekto nga maghatag ug internet connectivity sa mga pampublikong lugar ug mga institusyon sama sa mga pampublikong eskwelahan ug ospital. Kini ang flagship initiative sa DICT nga nagtumong sa paghatag ug internet connectivity sa tibuok nasud.

Dugang pa, ang inisyatibo nagtinguha sa pagpalapad sa internet access sa geographically isolated and disadvantaged areas o hilit nga mga lugar.

Samtang, gipasiugda ni Mayor Frederick Siao ang estratehikong pagbutang sa libreng wifi alang sa mga publikong lugar ug hotspots sa tibuok siyudad.

“Ngano gibutang sa public areas? Para easy accessibility sa mga kabatan-onan nato. Daghan kaayong mga pamilya diri sa Iligan nga walay access sa free WiFi,” sumala niya.

Ang programa gipatuman na sa tulo ka mga importanteng dapit sa siyudad, lakip ang City Hall Complex—Anahaw Amphitheater, Don Gregorio Lluch Memorial Hospital, ug Barangay Digkilaan. (Ni Lou Ellen L. Antonio)