‘High-ranking’ NPA kumander sa Mindanao misurender

Mga kanhi rebelde nakadawat sa food assistance gikan sa
Provincial Government of Bukidnon. (JNC Lumambas)

MALAYBALAY CITY - Misurender sa kasundalohan sa 4O3rd Infantry Brigade si Randy Canoy Bayot alias Gov ug Kap nga kanhi spokesperson, deputy secretary, ug finance officer sa North Central Mindanao Regional Committee sa Communist Party of the Philippines-New People’s Army (CPP-NPA).

    Atol sa gipahigayong ‘Friends Rescued’ Forum sa 403rd Brigade, gisaysay ni Bayot ang iyang mga kaagi sulod sa 19 ka tuig nga pagserbisyo sa walhong grupo diin matud niya walay kalambo-an ang iyang kinabuhi busa naka desisyon siya nga mobalik na sa sabakan sa gobyerno. Kauban ni Bayot ang 43 ka mga kanhi lider ug ‘combatant’ sa rebeldeng CPP-NPA nga gipresentar sa media.

    "Kagutom ug kakulang sa suporta ang usa sa mga rason sa among pag-surender. Sa among pagbalik sa gobyerno, daghang mga programa ang gi-offer sa amo. Busa nalipay ko kay hugot ug tinuoray ang tabang gikan sa atong gobyerno. Ang pag-sustain nalang niini kung unsaon kaha. Labaw sa tanan nakita ug nakauban na pud nako akong mga anak ug mga minahal sa kinabuhi," dugang niya. Dala sa mga nag-surender ang 39 ka mga high-powered firearms.

    Sumala ni Brig. Gen. Michele Anayron, Jr., ang mga armas i-turnover kini ngadto sa Philippine National Police-Bukidnon Provincial Office kay didto sayron kung ang nasangpit nga mga armas ga-function pa ba ug kung unsa ka-'powerful' ang matag pusil nga gisurender.

    Si Provincial Director Rhona Pedraza-Abadilla sa Department of the Interior and Local Government-Bukidnon, mipasabot nga ang gisurender nga mga armas dunay mga gitakdang kantidad kon ‘firearms remuneration’ depende sa klase ug gidak-on niini.

    Tungod ini, nagpasalamat si Anayron sa local ug national nga kagamhanan tungod sa pagsuporta sa mga programa sa kasundalohan.

    "We can't achieve this success without any support from the provincial government. Ang POPS [Peace and Order and Public Safety] budget sa probinsya nag-allocate og dugang pundo alang sa pag-conduct sa atong operations to go after the NPA rebels," dugang ni Anayron.

    Gikalipay’g dako ni 4th Infantry Division Commander Maj. Gen. Jose Maria Cuerpo II ang pagsurender ni Bayot og mga kauban niini, diin giseguro niya nga naa ang nagkalain-laing ahensya sa gobyerno andam motabang kanila.

    "Naningkamot ang atong mga kasundalohan aron mahinabi ang atong former rebels nga mobalik sa sabakan sa gobyerno kay daghang programa ang nagpaabot kanila. Gusto natong tanan nga biyaan na ang dalan nga napuno sa kagubot," matud ni Cuerpo. (Bernadith G. Epan)