Si Duterte ug ang kamatayon sa mitolohiyang Aquino
ANG RITING sa pagsalig sa Katawhang Pilipino sa Pangulong Duterte nanganawkanaw sa tumang kataas sa ang-ang nga ekselente, pwedeng hitupngan apan lisud malabwan. “Record high”, sa ato pa, ningguba sa mga riting. Kini nga pagsalig iya nga naangkon bisan taliwala sa pagpanlimbasog sa oposisyon ug sa mga kapunongang walhon nga pakaulawan ug ihulagway siya nga sama sa demonyo pinaagi sa mga isyu nga pabalik-balik ug makapuol na sama sa extra-judicial killings, mga hulga sa balaod militar, kun hinganlan nato ang pipila.
Bisan pa og gitam-okan siya og mga pagdaot, pagpakaulaw ug mga pagbutangbutang, ang Pangulo nagpadayon og trabaho inubanan sa nabatasan na niyang estilo sa pagdumala nga alang sa uban talagsaon apan naghimo kaniya nga lahi kaayo sa mga tradisyonal nga politiko partikularmente na sa nanag-unang Pangulo sa nasud. Buyno, tugotan ta nga di sila ganahan sa iyang pamaagi sa pagdumala, pagpadagan ug pagpatuman sa mga programa sa gobyerno, apan di nila ikalimod nga dunay resulta. Ang mga kritiko pwedeng mosalikway niini apan ang publiko nagasaysay og mas makahuloganon ug undanon nga mga sugilanon.
Ang mapiogon nga suporta para sa Pangulo ninglunod ug ningdan-ok sa mga isyu nga gipasulbong sa mga kritiko batok kang Duterte. Bisan sa mga survey sa mga “senatoriables”, walay bisan usa sa oposisyon ang nakatungtong sa magic 10. Naghatag ni og kahingawa kang Bam Aquino nga di pa lang gyud dugay ningtulon sa iyang dalag nga garbo ug nagpasambingay nga andam siyang makigtinabangay sa Duterte Administration sa iyang programang pangkalamboan. Sa akong banabana, kun ang sunod nga eleksyon himoon pa ugma dayon, walay bisan usa man lamang gikan sa Partido Liberal ang manimaho, hurot tanan pildero. Para kang Bam nga mao na lang ang nahabilin nga Aquino nga aktibo sa politika, ang survey mora og mirida o signos ug bagting sa kampana sa misa rekim nga nagpahasubo sa kamatayon sa politika sa angkan nga Aquino.
Aduna nay duha ka yugto sa mga administrasyon sa mga Aquino. Ang unang yugto nag-awas-awas sa pagkabanga o dili kaantigo sa trabaho ug pagkamapanimaslon o pagkavengador. Ang ikaduha nagpadayon niini, ug midugang sa pagluklok ug pagsistematisa sa pagkadunot sa burukrasya ug ang pagdaldal sa mga krimen sa mga sindikato labi na gyud ang pagkawalay pagpakabana sa nagatubo ug nagadako nga hulga sa terorismo.
Kadaghan gisulayan og tabon ang mga sala nga gihimo ug wala gihimo labi na gyud sa unang yugto sa administrasyon sa mga Aquino, apan namatay ra sab ni tungod sa pagkadiskubre sa mga tipak ug liki nga kaniadto natabonan sa kasilag batok sa mga Marcoses. Apan mora og ang mga Marcoses hunit og pwersa nga milahutay, gawas lamang sa patay-patay nga kampanya para sa pagka Puli Pangulo kun diin napildi si Bongbong Marcos ni Leni Robredo nga way kasilaw ug ninglabaw lang og boto nga pareha lang kabaga sa lagos nga nagagunit sa ngipon. Ang salang mortal sa gobyernong Cory Aquino dili ang paggunit sa Hacienda Luisita nga apil ang mga saop sa maong halapad nga kayutaan, kundili ang pagpasar sa Comprehensive Agrarian Reform Program nga nagamando nga ang yuta iganti kang bisan kinsa nga Tom, Dick ug Harry nga walay yuta ug lagmit nagdumot sa baho sa yuta apan nagmahal sa presyo niini. Gimugna ang CARP nga ang prinsipal nga tumong mao ang pagsalbar sa Hacienda Luisita ug mao kini ang una ug wa nay lain nga rason ngano nga ang aktuwal nga mga saop ang nawad-an na hinoon og yuta nga kultibahonon.
Ang pagtungha sa bag-ong lider gikan sa kailayahan sa Mindanao hingpit nga ning-usab sa pangkinatibuk-ang kamada sa politika. Kapalaran ni Duterte ang mahimong Presidente. Sa dihang ang iyang inahan, si Nanay Soleng, gi-appoint nga Bise Mayor sa Siyudad sa Davao tungod sa iyang papel sa mga martsa-protesta sa Yellow Friday, matinahoron kini niyang gibalibaran. Ang liderato sa rehiyon ningdesisyon nga ang pangalan ni Rodrigo ang ibutang sa appointment paper. Nahimo siyang Mayor sa sulod sa 23 anyos, nga naputol lamang sa iyang pagserbisyo sa Kamara de Representante. Sa piniliay sa pagka Pangulo, siya ang kandidato nga puno og pagduhaduha kun modagan ba o dili. Apan saksi ako kun unsa ang duot sa katawhang managtapok nga molibot sa iyaha samtang siya nagakampanya sa Pederalismo. Kada asembliya mahimong talan-awon sa kagahob kay ang maong kalihokan matapos man og dahunog sa tinigum nga hugyaw sa mga nanambong nga nagkanayon, "Duterte pagka Presidente", Takbo! Takbo! Takbo". Taas-taas ang panahon nga ang iyang pangalan dili apil sa mga survey. Apan sa dihang giapil na, ang mga institusyon nga naghimo sa mga survey nakadiskubre sa wa nila damha. Ang tawo nga hugot nga nagdumot sa gahum sa Pangulo mao ang nag-una.
Si Pangulong Duterte ningtak-op sa katapusang yugto sa mitolohiyang Aquino. Karon makakita na ta og mga panid sa atong kasamtangang kasaysayan nga ginasulat samtang ang mga hitabo nagabusikad nga makalipong tungod sa kapaspas. Basta estedi ug makanunayon lang ang iyang pagtimon, padulong na ta sa kabulahanan. Patay na ang mitolohiyang Aquino ug walay nagsubo.(Jun Ledesma)
Like Us on Facebook: https://www.facebook.com/mindanaoexaminer
Follow Us on Twitter: https://twitter.com/MindanaoExamine
Read Our News on: http://www.mindanaoexaminer.com /http://mindanaoexaminernewspaper.blogspot.com/
Share Our News
Digital Archives: issuu.com/mindanaoexaminernewspaper
No comments:
Post a Comment