'Ayaw’g hulhogi ug ulug-ulogi si Duterte' By Jun Ledesma

Mga Sulat Gikan sa Davao:

                                 

DILI PA LANG gyud dugay nga ang National Grid Corporation of the Philippines nagpagawas og usa ka serye sa makadani sa mata nga mga advertisement ug mga press release nga nagpakita nga kuno nagatabang siya sa gobyerno ni Pres. Rodrigo R. Duterte sa pagpalambo sa telecom industry. Nindot.

 

Sa ning-aging adlaw nagpagawas na sab ang NGCP og laing istorya nga ning-okupar gyud og usa ka panid nga nagbandera sa titulo nga “NGCP, DICT nagkasinabot bahin sa kapasidad sa fiber optic sa NBP”. Ang mga larawan ni Department of Information and Communications Technology Usec. Eliseo Rio Jr. ug Henry Sy Jr. sa NGCP prominenteng ning-okupar og dako nga espasyo sa panid nga ningkarga sa maong istorya. Kahibudngan lang kaayo kay walay pamahayag gikan sa National Transmission Corporation (TRANSCO) nga maoy tag-iya sa mga kabtangan nga gikasabutan sa NGCP ug DICT nga idalit ngadto kang Pangulong Duterte ug sa publiko.

 

Nganong wala man si Kalihim sa Panalapi Carlos G. Dominguez ug si TRANSCO Pres. Melvin Matibag iapil sa maong panagsabot? Wala pa gyud mausab ang akong pagtuo nga ang Concession Agreement sa paggamit sa power grid usa ka kasabutan nga pagahimoon lang sa duha ka establisimiyento nga dunay lehitimong katungod sa paghimo niini: ang TRANSCO ug ang  NGCP.  Unsa’y nahitabo tali sa TRANSCO ug sa NGCP nga ningresulta sa pagpadaplin sa DOF/TRANSCO sa kalit ug hinanaling akto sa kamaayo kuno ni Henry “Big Boy” Sy, Jr.  sa pagtabang kuno sa ikatulong magdudula sa industriya sa telecom (nga pilion pa sa gobyerno) ug sa National Broadband Project sa DICT?

 

Ang tumong niining maong Sulat gikan sa Davao mao ang pagtangtang sa takoban ug pagsanta ug pagbisto sa lansis nga nagpaluyo sa Concession Agreement. Usa na usab kini sa mga mahimayaon nga mga misteryo nga ginatago sa mga sakop sa oligarkiya sukad pa sa administrasyong Aquino. Langyaw ang mga pangalan sa maong mga misteryo nga mahimayaon: “Mile Long Island”, kabtangan nga anaa gyud sa sentro sa Makati, mga kaso sa pagbayad og buhis sa “Mighty” Cigarette ug ni “El Kapitan” Lucio Tan nga ningsangpot sa pag-areglo pinaagi sa pagbayad og binilyon ka pesos sa buhis ug sa bag-o pa gyung haon gikan sa abohan nga katikaran – ang kalit nga pagsurender ni MVP sa“CURE” Telecom frequencies human mobungat nga magpabayad sa gobyerno og P3-billion aron iuli ang mga frequencies nga gihatag sa gobyerno og libre. 

 

Hugot ug lig-on namong suportahan ang personal nga krusada ni Pangulong Duterte ug Kalihim Dominguez kontra sa krimen ug kurapsyon ug gusto namong pahinumdoman ang mga sakop sa oligarkiya nga nagakontrol sa mga dagkong industriya sa nasud nga “magtarong mo kay bag-o ni nga panahon”. Hinumdomi, ang mga bungbong adunay mga dalunggan nga maminaw ug mga mata nga nagsud-ong. Panahon karon sa pagpakabuotan.

 

Dili kaduhaduhaan ang atong tinubdan: ang advertisement mismo sa NGCP nga gimantala sa tanang nanag-unang mga mantalaan niadtong niaging duha ka semana. Ang maong advertisement mosangko sa konklusyon nga ang TRANSCO nagdumili nga mopirma og kasabutan tali kaniya ug sa NGCP. Tungod niini, dili pwede ang NGCP nga mopaabang sa dark fibers ngadto sa mga magdudula sa telecom. Apan ato sab nga sud-ongon ang nahimutangan ni TRANSCO President Melvin. Sabton ug analisahon nato ang tinubdan sa kasamok.

 

Ang nahisgotan nga “dark fibers” mao ang wa magamit nga mga fiber optic core nga nakasukip sa mga conduit nga anaa sa sulod sa stranded grounding wire nga nagahatag og proteksyon sa power line kontra sa kilat. Ang modernong teknolohiya ningkombinar sa dark fiber ug sa grounding wire aron magamit sa komunikasyon. Ang mga desinyo karon sa mga power tower, mga tulay, mga tunnel ug railway nagalakip na niining maong kahimanan aron maoy “mosapnay” sa mga galamiton nga  pangkomunikasyon ug pang-enerhiya. 

 

Apil na sa gi-award nga concession gikan sa TRANSCO ngadto sa NGCP ang katungod nga moabang sa mga kabtangan nga makatabang o ancillary assets sama pananglit sa mga asset sa telekomunikasyon segun sa gilatid nga limitasyon sa Seksyon 20 sa RA 9136 o EPIRA law bahin sa paggamit sa 50% sa income nga gikan sa pag-arkila sa mga ancillary assets.

Makataronganon kini kaayo. Kaso lang kay morag dunay pagliki nga nahitabo sa unang duha ka tuig sa honeymoon sa TRANSCO ug NGCP. Nadunggan namo nga ang NGCP ningpaabang sa mga dark fiber ug ubang assets lakip na ang mga bakanteng lote, mga torre nga tag-as og boltahe para sa installation sa antenna sa telecom nga walay pupahibalo sa TRANSCO bisan pa og obligado ang NGCP segun sa nalatid sa concession agreement.

 

 Ang mga lease agreement sa mga kompaniya sa telecom molungtad og kapin sa usa ka tuig. Gialegar nga ang tanan nga income sa maong mga lease contract wala itug-an sa gobyerno ug gisolo lang sa NGCP. Matud pa sa tinubdan sa akong impormasyon, ang NGCP dili moadmitir nga nag-instalar sila og mga kahimanan sa Telco. Apan ang mga larawan nga gipakita sa ako sa mga contractor nga wa bayri nga maoy gipadismantle sa mga gipang-instalar nga mga Telco facilities nagaasoy og lahi nga istorya. Dili na ni nako isugilon pa. (Lain pay ato. Ang usa ka parisan sa fiber optic core mocostar og P790 kada kilometro. Wala koy datos kun pila ang bayad sa lokasyon ug pagkabit sa instalasyon.)

 

Si Presidente Matibag sa TRANSCO, matud pa sa akong informant, nagpakilooy sa NGCP nga bayran ang ilang mga obligasyon tungod kay 50% sa kita gikan sa mga ancillary asset kinahanglan nga gamiton para sa pagpakunhod sa transmission wheeling rate segun sa desisyon sa Energy Regulatory Commission. Sa akong tagna, ang makabenepisyo unta niini mao ang mga electric cooperative nga dili konektado sa grid.

 

Mao kini ang kamada sa mga hitabo. Ambot og nasayod ba si Usec Rio niini. Nakahibalo ba siya o wala, angay na niyang tan-aw-tan-awon og asa padulong kining panagbangga sa mga interes.

 

Segurado ko nga ang administrasyong Duterte dili gyud mahulhogan ug maulug-ulogan sa mga press release ug mga propaganda. Usa na sab ni ka kaso nga angayng hilngon ni Cesar Dulay sa Bureau of Internal Revenue. Angayng ukayon og maayo og unsa kadako ang income nga wala ihatag sa gobyerno, apil na ang paglutos sa mga gialegar nga mga bug-at nga kalapasan.

 

Human nako og sulat niini, nagadula pa gihapon sa akong hunahuna ang pangutana: nganong ang mga sakop sa oligarkiya dili man gustong moistar ug mopalambo sa ilang core business? Sa kaso sa NGCP, tungod kay ila na mang gipadayag nga wala sila sa bisnis sa telekomunikasyon, nganong di na lang nila isurender and ilang mga ancillary rights sa dark fiber ngadto sa TRANSCO? Gikan dinhi, ang TRANSCO ug DICT magtinabangay na dayon og palambo sa maong asset subay sa interes sa publiko ug sa industriya sa telecom.

 

Nganong kining mga higanteng kompaniya nga pribado dili makahatag og insakto nga sweldo sa ilang mga empleyado, moabli og dugang oportunidad sa trabaho ug magtinarong ug tinud-anay nga mobayad og insaktong buhis tungod kay sila man sab ang pinakadako ug pinakadaghan nga maani gikan sa mga programa, imprastruktura ug serbisyo sa gobyerno nga nahimo gamit ang natigum nga buhis? Nganong kinahanglan pa nila og usa ka Duterte nga mohamok ug molutos kanila? (Jun Ledesma)

 

 

Like Us on Facebook: https://www.facebook.com/mindanaoexaminer
Follow Us on Twitter: https://twitter.com/MindanaoExamine
Read Our News on: https://www.mindanaoexaminer.com and  https://mindanaoexaminernewspaper.blogspot.com/
Share Our News
Digital Archives: issuu.com/mindanaoexaminernewspaper