'Kuskos Balungos bahin sa mga manag-suong Tulfo’ Ni Jun Ledesma

Sulat gikan sa Davao: 'Kuskos Balungos bahin sa mga manag-suong Tulfo’ Ni Jun Ledesma



ANG MGA TULFO bantugan nga mga personahe sa mass media. Daghan ang maminaw sa ilang mga sibya, motan-aw sa ilang mga pasundayag ug mobasa sa ilang mga kolum sa peryodiko. Unsa may sayop ug makakontrobersiya niana? Sa TV 5 sila niadto apan ang nagdumala sa maong network ningsira sa pipila sa ilang mga sanga ug miretiner lamang og usa aron sa pagtuko sa garbo sa tag-iya.

Dili nako kaila ang mga managsoong Tulfo, bisan og ang ilang kagikan gikan sa Davao Oriental, apan gawas sa ilang pagka inila nga isog ug hugot-bakos nga moatubang og isyu, maayo silang modumala og kahigayunan ug ang managsoon solido nga moatubang sa mga isyu  nga walay kukahadlok. Sila nag-akupar og talagsaon nga pwesto sa mass media nga nagpalahi kanila sa ubang tawo nga pareha og propesyon. Apan kaila nako personal si Wanda, bugtong igsoong babaye sa mga managsoon nga tag-iya sa numero unong agency sa Philippine Airlines sa Mindanao. 

Ang mga Tulfo nagaprodyus sa ilang kaugalingong programa ug ang unod nagpakita nga dagko sila og gasto pagkuha ug pagtigom og mga eksklusibong materyales nga nanginahanglan og kaisog pagkuha sa film. Si Ben pananglitan mora og kauban sa mga kuyaw nga operasyon sa mga pulis samtang si Mon, Raffy ug Erwin way pupanagana nga mohatag sa ilang mga kritisismo ug pagsaway sa mga kurap ug baliko nga mga opisyales sa gobyerno, nag-akupar ba sila sa kinapungkayan nga pwesto sa gahum o impluwensya o kriminal ba sila nga nalimtar na ang pangisip. Ideliver nila ang hapdos nilang mensahe diretso sa atay-atay.

Pagbalhin nila sa PTV4 ug Radyo ng Bayan isip mga block-timer, ang desisyon sa pagdawat nila sayon ra og dali rang gihimo. Palong ang mga sibyahanan ug mga programa sa network sa gobyerno ug ang mga survey nagpakita nga tua sila kanunay sa ikog sa mga survey. Gawas pa, ang managsoong Tulfo klaro kaayo nga kontra sa krimen sa bisan unsang kategoriya, ug kana haum kaayo sa programa ni Presidente Duterte.



Ang mga pwersang Machiavellian ug mga irong buang sa himatyon nga oposisyon nagtuo nga ang presensya sa managsoong Tulfo sa mga sibyahanan sa gobyerno ug ang ilang produksyon nga pagabayran sa gobyerno wala mahasubay sa saktong pamaagi. Nga si PCOO Sec. Martin Andanar angay daw nga imbestigahon sa iyang pagtugot nga ang mga managsoong Tulfo mosibya sa ilang mga programa sa PTV4.



Usa na sab ni sa pagsulay og himo ug pasabog og intriga sa sulod sa Presidential Communications Operations Office. Pero tan-awon nato ang mga datos. Wala pa sukad masukad mahitabo nga ang gidaghanon sa nanan-aw ug naminaw sa network sa radyo ug telebisyon sa gobyerno kalit nga ningsulbong sa dramatikanhong pamaagi, karon pa lang. Ang paglanding sa PTV4 isip No. 4 sa survey usa ka mahimayaong misteryo. 

Makab-ot lamang ni sa dunay gihuptan nga igong katakos tungod sa kadaghan sa kompetensya: 18 ka mga analog TV station sa Metro Manila, wa pay labot ang mga sibyahanan sa mga digital nga mga balita. Kini naggumikan sa reprogramming nga gihimo ni Secretary Andanar ug angay sab nga iapil sa kwentada ang mga suking tigpaminaw ug tigpanan-aw nga gidala sa mga programa sa managsoong Tulfo.

Lain pay ato, ang PTV4 ningsulod na sa teritoryo sa digital media. Sa Davao, HD na ang signal ug maghatag ni sa mga manan-aw og mga alerto kun dunay makaalarma nga kahimtang sa kinaiyahan. Maulaw si Secretary Andanar nga mo-angkon nga iya ning kahimoan mao nga ako na lang pud ipahibalo sa tanan nga siya ang responsable sa pagpausbaw sa kapasidad sa mga kahimanan, pagpamalit og dugang kahimanan, ug ang pagpakaylap ug pagpalapad sa maabot sa pagsibya sa TV ug radyo sa gobyerno. 

Siya ang nagtukmod niini tanan ug karon nagapadayon na. Direktor ko kaniadto sa programa sa TV ug usa ka estasyon sa radyo sa Davao. Ang mga mamamalit sa media (advertising companies) motan-aw jud sa mga resulta sa mga survey aron didto sila mo-advertise sa kusog sa survey. Kun ang estasyon taas og riting, tan-awon sab nila kun asa ang programa ang pinakadaghan og suking tigpaminaw o mananan-aw. Ang sunod nga pangutana: unsa may dautan kun ang Tourism Department o ubang ahensya sa gobyerno moplastar og mga ads sa mga programa nga ginaprodyus sa mga Tulfo?

Ngano man diay og naa si Secretary Wanda? Sa laing bahin, nganong maguol man si Secretary Wanda kun ang mga promotion sa DOT makakuha og mga suking mananan-aw sa mga program ni Tulfo? Way laing sangkoan ang cheche bureche kundili kasina, kapait ug kaligutgot. (Jun Ledesma)