SA PANAGBINGKIL TALI sa Simbahang Katoliko Romano ug ni Presidente Rodrigo R. Duterte, pilderong dako ang simbahan. Si Duterte sa mga katuigan nga siya nagserbisyo sa lungsod isip Bise Mayor, Mayor, Congressman ug sayo sa iyang termino pagka Presidente wa gyud magtrampas sa teritoryo sa mga relihiyoso.
Sa pipila ka higayon nga naghisgot siya bahin sa iyang pagtoo sa Ginoo, bisita siya sa programa nga “Give Us This Day” sa iyang higala nga Pastor nga mao si Apollo C. Quibuloy. Apil ko sa pag-interbyu kaniya kun diin iyang ibatbat og gamay ang iyang personal nga kasinatian sa Diyos. Kabalo ko niadto pa nga ang pagtoo ni Duterte sa Labawng Makagagahom wala maggikan sa katekismo, sa mga dogma ug doktrina apan mas lawom pa kini kay sa paglarawan sa iyaha sa kaobispohan ug kaparian.
Tugoti ko ninyo nga hisgotan ang nangagi. Sa dihang ang mga lideres nga politikal sa Mindanao ninglunsad og usab sa kalihokang Pederalismo ilang gihangyo si Mayor Duterte nga maoy mangulo sa usa ka kampanya nga nasyonal aron sa pagbanhaw ug pagtantya sa hapak sa gobyernong Pederal. Nakasaksi ko sa maong mga panagtapok nga nagtuki sa Pederalismo. Ang di nako makalimtan mao ang paghatag niya og diskurso atubangan sa mga Chief Executive sa Asia nga nag-asembleya sa usa ka hotel sa sentro sa Makati City, teritoryo ni Jojo Binay.
Sa open forum, gilaktawan nila ang temang Pederalismo tungod kay ang mga nangulo ug nanag-iya og mga industriya ningdasig kaniya sa pagdagan pagka Pangulo sa nasud! Si Duterte nagbalikbalik og pamalibad sa panawagan ug sa gitanyag nga suporta sa rason nga duna nay mga aspirante pagka Presidente ug sila tanan kwalipikado. Bahin sa iyang kaugalingon, moingon siya nga ilawom siya sa kabubut-on sa Diyos nga maoy nagabadlis sa kapalaran ug nagalatid sa padulngan sa tanan.
Naobserbahan nako si Duterte nga nagalayog sa kabug-at sa desisyon kun molansar ba siya o dili labi na kay lawom kaayo ang iyang pagdumot sa pagkadako sa gahum sa usa ka Pangulo. Ang mga survey nagpakita nga nagasaka ang iyang popularidad padulong sa kinatumyan bisan og di siya kandidato. Sa adlaw sa pag-file og certificate of candidacy wa siya makit-i ug ang adlaw natapos nga wa si Duterte sa talaan sa mga kandidato pagka Pangulo. Sa dihang gisukmatan siya sa iyang mga higala ug sa media nganong nagmakuli siya sa pagpakigbugno sa posisyon, ang mubong tubag ni Duterte nga kabubut-on sa Diyos ang magdeterminar sa akong kapalaran. Ang pinakataas nga damgo sa abogado nga Duterte mao ang pagka city fiscal.
Sa dihang nahimo na siya nga fiscal, malipayon na siya ug kontento na kaayo sa iyang kinabuhi. Malas lang kay natugpa siya sa natad sa politika nga wa gyud sa iyang mga damgo. Ang iyang nanay, si anhing Soledad “Nanay Soleng” Duterte, usa ka haligi sa “Yellow Friday” martsa protesta batok kang Marcos, gi-appoint nga Vice Mayor sa Davao City ni Cory Aquino. Wa niya dawata ang maong posisyon mao nga gipapas ang iyang pangalan ug giilisan og “Rodrigo”.
Sa unang regular nga eleksyon bisan ang oposisyon sa politika nga gipangulohan ni anhing Sen. Alejandro Almendras solido nga ningsuporta kaniya. Ang kamot sa Ginoo lagmit gyud nga naggiya sa iyang kapalaran. Sa katapusang eleksyon Presidensyal si Martin Dino, kandidato sa PDP-Laban, ning-atras pagka kandidato human siya gideklara sa Commission on Elections nga kandidatong way paglaom nga modaug ug nagsamok-samok lamang. Kinsa pa ang laing kwalipikado gawas kang Rodrigo Duterte ang kandidato nga nagduha-duha? Nakita ni Duterte ang kamot sa Ginoo ug iyang gitugyan ang iyang kaugalingon. Ang iyang lig-on nga relasyon sa Ginoo nga nakaangkla sa iyang personal nga kasinatian ug mga engkwentro sa Ginoo nga nagtukmod kaniya sa pagtugyan sa iyang kapalaran sa Labawng Makagagahum.
Ang sunod nga mga hitabo ug katikaran napatik na sa kasaysayan. Gisaad ni Duterte ngadto sa Diyos nga iyang atimanon ang problema sa droga nga nagaguba sa panglawas, pangutok ug moralidad sa kabataan, wagtangon ang kurapsyon ug tanang porma sa mga kriminal nga sindikato nga nagsakit sa nasud. Dugoon kini nga sangka.
Naa sa record nga dunay mga 3,000 nga napatay sa mga police operation ug duna sab mga biktima nga gipatay sa mga drug lord aron patak-umon ang mga baba sa ilang gisuspetsahan nga mopiyait ug motudlo kanila ug sa ilang mga ginsakupan. Sa laing bahin hapit mokabat og usa ka milyon nga nagatulak ug nagagamit og droga ang ningsurender sa mga awtoridad aron sila ma rehab. Ang problema kay ang mga lideres sa kaobispohang Katoliko ningsugod og kwestyon sa giyera kontra droga ni Duterte.
Kauban ang oposisyong politikal ninglunsad sila og mga protesta sa kadalanan ug ilang gitandi si Duterte sa demonyo nga mora na hinoon og ang tanan nga gihimo niya sa kampanya batok sa mga sindikato sa mga kriminal ug sa droga dako nga sayop. Ang mga kritiko wa magtan-aw sa kadaghan sa nasalbar ug ninghilak na hinoon para sa mga kriminal nga ningpili nga makigpinusilay sa mga tinugyanan sa balaod.
Alang kang Duterte, ang Ginoo nga iyang gituhoan nagaprotekta sa mga inosente ug sa mga walay mahimo, mao na nga iyang gipursige ang kampanya hangtud karon. Ang Simbahan nagakondena kang Duterte nga way lipud-lipod ug way hunong-hunong ug sa akong tan-aw usa ni ka pamaagi sa pagpakita nga ilawom sa iyang impluwensya ug gahum ang mayoriya sa mga Filipino nga miangkon nga sila Katoliko. Dinhi, ang Simbahan ninglapas na sa iyang teritoryo.
Unsa kahay buhaton ni Duterte? Itugyan niya ang iyang kaugalingon ngadto sa mga tawo nga gustong molatigo kaniya ug gustong mobanhaw sa kademonyohan sa Grand Inquisition? Sa akong suspetso, si Duterte nagpugong lang sa iyang kaugalingon. Nakahibalo siya sa mga kahuyang sa kadaghanan sa nag-akusa kaniya. Himasa siya ug kahibalo siya sa maitum nga yugto sa Simbahan. Sa pagkakaron, wala pa niya paklia ang panid sa kasaysayan sa Simbahan ug sa mga eskandalo sa sulod nga gipangayoan ni Pope Benedict og pasaylo.
Si Duterte wala pa mokutlo sa mga gibuhian nga pulong ni Pope Francis nga nag-ingon nga mas maayo pa nga ang usa ka tawo atheist o dili motuo sa Ginoo kay sa ipokritong Katoliko. Bahin kang Bro. Eddie Villanueva nga ning-apil sa labo-labo, pugngi nang imong baba, ayaw og apil-apil sa politika, padayon lang sa imong relihiyon ug ipatuhop ang leksyon ngano nga kaduha ka na mapilde sa imong pagdagan pagka Presidente. Dili buang ug dili bobo ang Ginoo. Maayo siya sa tanang panahon. (Jun Ledesma)
Like Us on Facebook: https://www.facebook.com/mindanaoexaminer
Follow Us on Twitter: https://twitter.com/MindanaoExamine
Read And Share Our News: https://www.mindanaoexaminer.com/
http://mindanaoexaminernewspaper.blogspot.com/
Digital Archives: https://issuu.com/mindanaoexaminernewspaper
See Media Rates: https://mindanaoexaminer.com/ad-rates/
No comments:
Post a Comment