Longganisa, chorizo, kompiskado sa Dipolog

DIPOLOG CITY - Kompiskado sa Bureau of Animal Industry (BAI) pinaagi sa Veterinary Quarantine Services IX sa Department of Agriculture, ang 50 ka kilo nga processed meat nga longganisa ug choriso gikan sa dakbayan sa Sugbo.

Kini ang nasayran gikan mismo ni Beaunoni Tingson, Livestock Inspector sa nahisgutan nga ahensiya kinsa naka destino sa Galas Port ning dakbayan sa Dipolog. 

(Images: LTD)

Sumala sa Livestock Inspector, gikompiskar ang maong mga processed meat gumikan kay napakyas ang mga tag-iya niini sa pagpakita sa shipping permit. Ang 50 ka kilo nga mga processed meat gipanag-iyahan sa 3 ka managlahing indibiduwal nga wala na hinganli sa mga personahe sa Bureau of Animal Industry. 

Human gikompiskar ang maong mga pagkaon, gidala kini ngadto sa buhatan sa City Veterinarian ug didto gilubong ang mga longganisa ug choriso diin kini gisaksihan ni City Veterinarian Dr. Imelda Villacrusis; OIC Regional Quarantine Officer Dr. Darwin Abadilla, ug mga personahe City Veterinarian Office niadtong semana. 

Matod pa ni Dr. Abadilla, mokabat sa kapin P9,000 ang market value sa kompiskadong mga processed meat. Kini gamay ra kaayo nga kantidad apan posibleng risgo alang sa multimillion nga balor sa hog-industry sa probinsiya kon gani nagdala kini sa sakit nga African Swine Fever. 

Nagpasalamat si Dr. Villacrusis sa mga personahe sa BAI tungod sa pakigtambayayong niini sa kagamhanang lokal sa Dipolog dinha sa pagpahigayon og regular nga inspeksiyon sa mga mosulod nga kahayupan ug mga by-products niini aron mapugngan ang pagpalusot sa iligal nga pagkaon nga wala nagbaton sa insaktong mga dokumento. (LTD)