Kano, itinumba sa harapan ng pamilya

KIDAPAWAN CITY – Patay ang isang Amerikano matapos itong pagbabarilin sa sentro mismo ng bayan ng Pikit sa North Cotabato sa magulong rehiyon ng Mindanao.

Nabatid na sakay ng kanyang nakaparadang truck ang 60-anyos na si Jeff Michael Keith kasama ng kanyang asawa at dalawang anak na menor-de-edad ng ito ay lapitan ng isa sa 2 lalaki at saka binaril kamakalawa ng hapon.

Tinangay pa ng mga salarin ang bag ni Keith na naninirahan sa Cagayan de Oro City. Hindi pa mabatid ang motibo ng pagpatay, ngunit sinisipat ng pulisya ang Angulo ng robbery dahil may lamang P200,000 ang bag ni Keith. May negosyo umano sa Pikit si Keith, ngunit hindi naman sinabi ng pulisya kung ano ito.

Hindi naman nasaktan ang pamilya nito sa pamamaril. Agad naman tumakas ang mga criminal sakay ng isang motorsiklo. Hindi rin tiyak kung mga rebelde ang tumira kay Keith at pinalabas lamang na pagnanakaw ito.

Walang ibinigay na detalye ang pulisya ukol sa dayuhan at hindi rin naglabas ng anumang pahayag ang US Embassy sa pamamaslang. Mahigpit ang bilin ng Amerika sa mga nationals nito na umiwas magtungo sa Mindanao dahil sa banta ng terorismo. (Mindanao Examiner)

Like Us on Facebook: https://www.facebook.com/mindanaoexaminer
Follow Us on Twitter: https://twitter.com/MindanaoExamine
Read Our News on: http://www.mindanaoexaminer.com /http://mindanaoexaminernewspaper.blogspot.com/
Share Our News
Digital Archives: issuu.com/mindanaoexaminernewspaper