Home quarantine sa mga pasyente sa Covid, apil na sa PhilHealth package

MAAPIL NA sa Philippine Health Insurance o PhilHealth Covid-19 package ang mga pasyenteng kwalipikadong adto magpaayo sa ilang balay o mag-home quarantine.

Matud pa sa PhilHealth nga aron mabayran ang ilang mga gastos sa pagpaayo sa Covid-19, angay moduso ang usa  ka pasyente og “social and clinical criteria” nga gitakda alang sa home quarantine.

Siguradong maapil dinhi ang mga pasyenteng adunay mild ug asymptomatic sa Covid-19, base sa PhilHealth circular 2021-0014 o ang Covid-19 Home Isolation Package (CHIBP) nga gi-post sa social media sa buhatan.

“This PhilHealth circular shall apply to all claims for home isolation services filled by accredited PhilHealth isolation facilities, infirmaries, hospitals and Konsulta providers who have accomplished the necessary documentary requirements to provide the CHIBP,” nakalatid sa PhilHealth circular.

Giklaro sa PhilHealth nga ang nahisgotang package mahatag lang sa mga accredited nga pasilidad sa mga lugar nga may surge o pagsaka sa mga kaso sa Covid-19 nga gitumbok sa Inter-agency Task Force on the Management of Infectious Diseases.

Samtang mahimong moduso og aplikasyon ang mga pasilidad hangtod sa Disyembre 2021. Ang mga pasyenteng mopaubos sa CHIBP angay nagpuyo usab sa high-risk area. “Patients shall shoulder payment for services not included in the package,” pagklaro sa PhilHealth. (Elvira Bongosia)