Biktima sa baha sa Lison Valley, midawat og ayuda

PAGADIAN CITY – Midawat og financial assistance ang 74 ka mga biktima sa nahitabong flashflood sa Lison Valley nga giapo-apod mismo sa ilang barangay hall.

Gipangunahan sa Department of Social Welfare and Development Region 9 ug Development Regional Team sa pagpanguna ni Agnes Sia kauban ang Provincial DSWD sa pagpanguna ni Ermilina Bacatan ang distribusyon sa maong ayuda alang sa mga residente sa maong lugar. 

Girepresentahan usab ni Atty. Jackie Bana ang kagamhanang probinsyal kauban ang mga political aspirants sa Team Yu Pagadian nga nakighimamat sa mga biktima sa baha nga nahitabo kaniadtong bulan sa Nobyembre. 

Sumala ni Kapitan Joel Babayson sa Lison Valley, kasagaran sa mga beneficiaries sa ayudang pinansyal mao ang mga mag-uuma nga adunay mga uma nga nabanlas tungod ka kakusog sa tubog-baha. Siyam sa 74 ka mga benepisyaryo ang nawad-an og panimalay diin modawat usab og laing cash assistance gikan sa Provincial Government. 

Gilauman nga madawat sa mga apektadong pamilya ang P5,000 alang sa partially-damaged nga balay ug P10,000 alang sa mga totally-damaged nga pinuy-anan.

Mapasalamaton ang mga mag-uuma nga aduna na silay ikagasto sa pagpanglimpyo sa ilang umahan nga natam-ukan ug balas ug bato aron makapadayon sila sa pagpananom nga naundang tungod sa trahedya nga karon pa nila nasinatian. (VZDS)