Business permits renewal extended hangtud Pebrero 28

DIPOLOG CITY – Malamposong na-aprobahan sa mga sakop sa Sangguniang Panlungsod ning siyudad ang “Lugway o Extension” alang sa deadline sa pag-renew sa mga business permits alang sa tanang balay patigayon sulod ning dakbayan, atol sa regular nga sesyon niadtong nakalabay nga Enero 11.

Ilawom sa pagpangamahan ni Konsehal Eduardo Baron, ug gisegundahan nila ni Konsehales Julius Gajonera ug Marilou Calibo, malamposong na-aprobahan ang Resolusyon No. 22-864, nga naglugway sa deadline sa business permits renewal ngadto na sa Pebrero 28 nga walay molta o surcharge. 

Sumala pa nga ang pag-extend sa deadline ang nagsumikad sa hangyo gikan sa buhatan ni Mayor Darel Dexter Uy ngadto sa Sangguniang Panlungsod alang na sa extension kalabot niini, basi usab sa report gikan ni Permits and License Division Chief, Viola Pino, nga dili igo ang 20 ka adlaw nga unang gitakda sa balaod gumikan sa pag-usbaw sa gidaghanon sa mga balay patigayon dinhi sa dakbayan, busa nagkinahanglan na kini ug extension. 

Kalabot ning maong kalamboan, subling gi-awhagan ni Pino ang tanang mga magpapatigayon dinhi sa dakbayan sa pagpa-renew na sa ilang mga business permits samtang sayo pa, aron makalikay sila sa posibleng pagpunsisok unya sa mga tawo, ilabi na kon ang paghikay sa mga papeles alang niini ang pagahimoon haduol na sa gikatakdang deadline. 

Dugang gipaklaro sa License Chief nga kadtong mapakyas sa pagpa-renew sa ilang mga business permits alang karong tuiga, taliwala sa gihatag nga lugway ang mapahamtangan sa silot sigun sa gitakda sa balaod. (AFB)