DIPOLOG CITY – Miluwat karon ang lokal nga buhatan sa Commission on Elections (COMELEC) ning siyudad sa pagdumala ni Election Officer IV, Atty. Jan Christian Babiera sa talaan sa “Common Poster Areas” dinhi sulod sa siyudad alang sa lokal ug nasudnong pinili-ay karong umaabot Mayo 9.
Kining maong talaan ang giluwatan sa naasoy’ng ahensiya pinasikad sa seksiyon 21 sa Comelec Resolution no. 10730, sa tumong nga magiyahan ang tanang mga kandidato dinha sa pagpatapot o pagbandilyo sa ilang mga election propaganda materials panahon sa pinili-ay dinhi palibot sa atong dakbayan.
Gawas sa talaan sa mga gidesignar isip mga “common poster areas” dinhi sulod sa atong siyudad, walay bisan unsa o bisan asang mga dapit sama sa kahoy, tanom daplin sa mga kadalanan, poste sa mga streetlights, pampublikong dapit sama sa plaza, parke, pader ug ubang susama, ang paga-tugotan.
Gipaklaro sa nahisgotang ahensiya nga ang pagpatapot o pagbandilyo sa mga election propaganda materials dinha sa mga dapit nga wala nalakip sa gitugotan sa COMELEC, maoy klarong paglapas ngadto sa Akta Republika No 3571. (AFB)
No comments:
Post a Comment