TESDA graduates, mipasar sa NC II assessment

DIPOLOG CITY - Singkwenta ka mga graduates sa Livelihood Skills Development and Enhancement Center (LSDEC) nga naka-avail sa Technical Education and Skills Development Authority (TESDA) scholarship sa Heavy Equipment Wheel Loader ug Heavy Equipment Motorgrader NC II ang malampusong mipasar sa National Competency Assessement Level 2.

Nasayran nga gipahigayon ang maong national assessment didto sa Gulayon Batching Plant alang sa mga Wheel Loader samtang didto sa Dipolog City Sports Complex gipahigayon usab ang nasangpit nga “assessment” alang sa Motorgrader, tanan dinhi sa dakbayan. 

Nasayran usab nga kadaghanan sa mipa-ilawom sa assessment ang mi-gradwar niadtong tuig 2019 apan tungod sa wala pay makita nga kwalipikadong assessor nga mupahigayon niini lakip na ang pagbutho sa pandemya, wala sila ma-assess dayon. 

Subay niini, malipayong mipadangat sa iyang pahalipay si Mayor Darel Dexter Uy ngadto sa mga graduates alang sa ilang kalampusan lakip na ang pagpasalamat ngadto kang TESDA Provincial Director, Miraluna Lopez alang sa iyang paningkamot nga mapahigayon ang maong assessment bisan pa sa nagapadayong pandemya. 

Gikataho nga si Alex Sabello, kinsa usa ka Lead Assessor sa Heavy Equipment Motorgrader ug Wheel Loader NC II, ang midumala sa maong assessment. Gikataho usab nga mipa-ilawom sa maong pasulit si Trainer ug Assessor, Jean Gerald Tan, aron mamahimong usa ka kwalipikadong trainer ug assessor sa maong mga kurso. 

Nasayran nga ang LSDEC maoy kasamtangang nag-inusarang accredited training center ug assessment center sa Heavy Equipment Operations Motor Grader ug Wheel Loader NC II sa Rehiyon IX. (JNP)