Pag-ila ug pagdayeg gipadayag ni Mayor Uy ngadto sa mga CDWs

DIPOLOG CITY – Subay sa selebrasyon sa Child Development Worker’s (CDW) Week, ang kagamhanang lokal sa Dipolog kauban ang City Social Welfare and Development Office ilawom sa Early Childhood Care and Development Program, ang mipahigayon ug duha ka adlaw pagbansay-bansay isip pagpangamdan sa subling pagbukas sa Early Child Education.

Si Mayor Darel Dexter Uy, sa iyang mensahe atol sa nasangpit nga kalihukan ang mitimbaya, midayeg ug mihatag og pag-ila sa mga CDWs gikan sa 21 ka mga barangay ning dakbayan tungod sa kakugi niini ug maoy nagsilbing ikaduhang ginikanan sa mga kabataan kinsa nagtungha sa dinha sa ilang tagsa-tagsa ka mga day care centers. 

Dugang pa niini, aron mapalambo pa ang maong programa, gilantaw karon sa iyang pamunoan ang posibleng pagdugang og mga Child Development Workers ug Early Childhood Care and Development (ECCD) Centers. Nasayran nga aduna nay 3 ka mga model ECCD Centers nga nahimutang sa Barangay Sicayab, Punta ug Olingan. (LTD)