DIPOLOG CITY - Ang Department of Social Welfare and Development uban sa koordinasyon sa kagamhanang lokal sa Dipolog pinaagi sa buhatan sa City Social Welfare and Development (CSWD), ang mitunol sa Livelihood Assistance Grant ngadto sa 80 ka benepisyaryo gikan sa nagkalain-laing barangay.
Si Mayor Darel Dexter Uy ug Nursida Taradji Sarail, Regional Program Coordinator sa Sustainable Livelihood Program sa DSWD, ang nangulo sa pagpang-apod-apod sa nasangpit nga grant nga mobalor og P15,000 matag benepisyaryo.
 |
| Mayor Darel Dexter Uy kauban si Nursida Taradji Sarail, Regional Program Coordinator sa Sustainable Livelihood Program sa DSWD. |
Nasayran gikan ni CSWD Officer Arlene Jatico nga ang maong ayuda gihatag ngadto sa mga gamay’ng negosyante dinhi sa dakbayan kansang mga panginabuhian ang apektado sa pandemya.
Dugang niya, tumong niini nga tabangan nga makabakod og balik ang mga na-undang nga negosyo tungod sa Covid-19. Niini, gi-awhag niya ang mga benepisyaryo nga gamiton ang P15,000.00 sumala sa tumong niini.
Samtang nagpasalamat si Uy ngadto sa DSWD tungod sa kanunay nga paghatag niini og ayuda sa mga Dipolognon. Gitambagan usab sa mayor ang mga benepisiyaryo nga dili kalimtan ang pag-ampo aron magiyahan sa kahitas-an.
Mapasalamaton usab ang Regional Program Coordinator nga si Sarail ngadto ni Uy tungod sa pagpanglimbasog niini nga tabangan ang mga lumulupyo aron makasugakod sa kalisod gumikan sa pandemya. (LTD)
No comments:
Post a Comment