PAGADIAN CITY - Gidasig sa Philippine Drug Enforcement Agency ang mga mayor sa Zamboanga del Sur aron mas hingusgan ang kampanya batok sa droga, atol sa Joint Meeting sa Provincial Peace and Order Council ug Provincial Anti-Drug Abuse Council.
Sumala ni PDEA Provincial Officer Cesario Judilla Jr. nga dili magmalampuson ang ilang mga pagpaningkamot nga masugpo ang iligal nga droga kung wala ang tabang sa mga local chief executives sa ilang mga operasyon.
Segun sa datos sa ahensya, anaa na sa 80.32% ang mga drug-cleared barangays sa tibuok probinsya sa Zamboanga del Sur ug mao kini ang pinakataas sa tibuok Zamboanga Peninsula.
Sa pagkakaron, mokabat na sa 494 ang drug-cleared barangays gikan sa 681 nga total number of barangays sa lalawigan ug gilaumang madugangan pa kini sa sunod bulan human sa deliberation sa uban pang barangay.
Gibutyag ni Judilla nga ning bulan sa Hunyo 2022, anaa sa 10 ka mga high value target drug personalities ang nasikop sa ilang ahensya ug kapin 500,000 nga kantidad sa drogang shabu ang nasakmit sa ilang mga operasyon.
Pag-awhag sa ahensya ngadto sa LGU nga bantayan ang gitawag og “drug route” aron dili makalusot ang illegal drugs nga gikan pa sa mga silingang probinsya sama na lamang sa Lanao del Sur ug Lanao del Norte.
Agresibo usab ang pamunuan ni Gov. Victor Yu nga hinloan ang probinsya sa iligal nga droga hinungdan nga todo suporta kini sa kapulisan ug law enforcement authorities.
Sa ingon niini, mapanalipdan ug maproteksyunan ang katilingban ilabina ang kabataan batok sa makadaot nga gidiling droga.
No comments:
Post a Comment