NPA lider, napaslang sa Sultan Kudarat

KIDAPAWAN CITY – Napatay ng mga sundalo sa ilalim ng 603rd Infantry Brigade ang isang lider ng New People’s Army sa bayan ng Senator Ninoy Aquino sa Sultan Kudarat province.

Nakilala ang napaslang na si Emmanuel Fernandez matapos ng 10 minutong sagupaan sa pinagsanib na puwersa ng 7^th, 37^th, 57^th Infantry Battalions at ng 63rd Division Reconnaissance Company sa Barangay Buenaflores kamakailan lamang.

 

Sinabi ni Col. Michael Santos, commander ng 603^rd Infantry Brigade, na si Fernandez ang Secretary ng Far South Mindanao Region ng NPA, at may mga multiple warrants of arrest ito sa ibat-ibang kasong criminal.

 

“Nabawi ng ating mga sundalo ang mga armas ng teroristang lider ng NPA kinabibilangan ng isang .45 caliber pistol na may isang magazine at anim na rounds ng bala at M16 rifle na may isang magazine at 20 rounds na bala,” ani Santos.

 

Ayon kay Santos, may kasong arson, destructive arson, murder, frustrated Murder, multiple attempted murder, rebellion at robbery si Fernandez.

 

Pinuri naman ni Maj. Gen. Roy Galido, commander ng Joint Task Force Central at 6th Infantry Division, ang mga tropa sa pagkakapaslang sa lider ng NPA.

 

“Malaking kawalan sa NPA ang pagkamatay ni Emmanuel Fernandez. Hindi lamang ito makakadagdag sa vacuum ng kanilang pamumuno, pinapahina din nito ang moral ng kanilang mga miyembro na patuloy ang pagtakas laban sa tropa ng gobyerno,” wika ni Galido. (Mindanao Examiner)