DIPOLOG CITY - Nagpusot-pusot karon ang pagpahigayon sa “Gugma Ayuda ni Nanay Nene Outreach Program” sa nagkadaiyang barangay sa Zamboanga del Norte kada adlaw.
Ang buhatan ni Governor Rosalina “Nanay Nene” Jalosjos mibutyag nga halos kada adlaw na gipahigayon ang Gugma Ayuda sa nagkadaiyang barangay ug mga lungsod diin adunay mga panahon nga sulod sa usa ka adlaw duha ka hugna sa ayuda ang ilang ipahigayon sa managkabuwag nga dapit.
Si Atty. Ivan Patrick Ang nga maoy over-all coordinator sa Gugma Ayuda ug sa samang bahin tigpamaba sa gobernador mibutyag nga kini karon ang nahinagbo sa programa ni Governor Nanay Nene Jalosjos tungod sa daghang mga hangyo nga nadawat sa buhatan niini nga nagtinguha nga makapahimulos sa maong programa.
Kahinumduman unang gipalanog sa gobernador sa iyang pagpanumpa sa katungdanan nga ilawom sa iyang administrasyon ang nagkadaiyang mga sirbisyo ug ayuda gikan sa kagamhanang probinsiyal sa Zamboanga del Norte ihatod hangtud sa pinaka layo ug pinakahilit nga barangay.
Sa sayu pa ang Gugma Ayuda gitakda nga ipahigayon ka usa sa matag buwan apan tungod sa daghang mga hangyo sa nagkadaiyang kabarangayan nga nadawat sa buhatan ni Governor Nanay Nene Jalosjos gimandu niini nga doblihon ang pagpahigayon sa programa sibu sa makaya sa mga personahe sa nagkadaiyang buhatan sa probinsiya nga nalambigit niini.
Matud pa ni Atty. Ang nga sa nakalabay nga Hulyo 15 ang Gugma Ayuda ni Nanay Nene Outreach Program gipahigayon sa Barangay Uno sa lungsod sa Katipunan ning lalawigan. Sa gipahigayong medical consultations ug libreng tambal ingon man sa dental services ug libreng tuli ang Provincial Health Office nakalugway ug sirbisyo ngadto sa 420 ka mga lungsuranon sa nahisgutang barangay.
Samtang ang Provincial Veterinarians Office milugway usab sa ilang sirbisyo sama sa pagpamurga sa mga kahayupan ug paghatag libreng bitamina para sa manuk ug kanding ug sa samang bahin nagpahigayon ug anti-rabie vaccination ug nanghatag ug 250 ka milk tubes.
Gihatud usab sa Office of the Provincial Agriculturist sa Barangay Uno ang paghatag ug libreng organic fertilizer, lisu sa igtalanum nga mga utanon lakip na sa binhi sa mais.
Si Barangay Kapitan Gina Guimbarda-Salazar sa Barangay Uno nagpasalamat ngadto kang Governor Nanay Nene Jalosjos nga misamot ug ka sadya ug makahuluganon ang ilang pagselebrar sa ika 49 ka tuig nga anibersaryo sa barangay diin gipahigayon usab ang Gugma Ayuda.
Si Atty. Ang midugang sa pagpahayag nga sa samang adlaw susamang Gugma Ayuda ang gipahigayon usab sa Barangay Galas sa dakbayan sa Dipolog. Samtang sa nakalabay nga Hulyo 14 ang Gugma Ayuda ni Nanay Nene Ayuda Outreach Program gipahigayon sa Barangay San Antonio sa lungsod sa Katipunan.
Matud pa ni Atty. Ang susamang
sirbisyo ang gilugway sa Provincial Health Office diin mokabat sa 458 ka mga
lungsuranon sa maong barangay ang nakapahimulos. (PIC, Mindanao Examiner)
No comments:
Post a Comment