Capacity building alang sa basic life support, gipahigayon

DIPOLOG CITY - Madungagan na usab ang mga emergency responders sa panahon sa emerhensiya sa probinsya sa Zamboanga del Norte. Kini human gipahigayon ang ikatulong hugna sa tulo ka adlaw nga Capacity Building-Basic Life Support DRRM RA 10121 and Climate Change Adaptation Seminar didto sa PEO – Liloy Sub-Office.

Ang 3 ka-adlaw nga bansay-bansay nga gipasiugdahan sa kagamhanang probinsyal sa Zamboanga del Norter pinaagi sa Provincial Disaster Risk Reduction Management Office (PDRRMO). 

Si Engr. Alberto Dimasuhid, OIC sa PDRRMO nagkanayon nga ang tumong sa maong kalihukan aron madungagan ang kahibalo sa mga personahe sa PEO ug makatabang sa pagresponde ilabina ang maong nahisgutang buhatan ang unang matawag ug naay emerhensiya ug anaa sa nahisgutang buhatan ang mga ekwipo sarang magamit sa panahon sa bagyo ug uban pang matang sa kalamidad sama sa backhoe, dumptrucks ug uban pa.

Subay niini, mapasalamaton si Engr. Dimasuhid ni Governor Rosalina “Nanay Nene” Jalosjos ug Acting Provincial Administrator Wilberth “Jojo” Magallanes sa pagsuporta ug paggahin ug pundo alang sa pagbansay-bansay nga dako kaayog kapuslanan panahon sa emerhensiya. 

Samtang si LDRRMO Engr. Wyne Daarol sa lungsod sa Liloy, mapasalamaton usab sa probinsya sa pag-imbitar sa ilang gipahigayong Basic Life Support ug nanghinaot siya nga ang maong training magamit sa pagresponde ilabina sa panahon sa kalamidad. 

Dugang pa, ang maong training gitambungan sa 68 ka mga partisipante sa PEO-Liloy ug matod pa ni Engr. Dimasuhid, magsugod na usab sila sa ilang sunod nga Basic Life Support nga ipahigayon sunod semana sa lungsod sa Sindangan. (Rosella Aba-s, Maribeth Sibucao)