‘Troll farms’ pinaiimbestigahan sa Senado

NAIS NI Senador Risa Hontiveros na imbestigahan ng Senado ang mga umano’y “troll farm” at iba pang nagpapakalat ng fake news online.

Sinabi ni Hontiveros na tungkulin ng Senado na protektahan ang integridad ng gobyerno.

“Susuportahan ko ang isang panukalang batas na mananagot sa mga gumagawa ng fake news. Lalo na dahil nitong nakaraang kalahating dekada, tila yung buwis na galing sa taong bayan ay ginamit para din mag-finance ng ganitong klaseng operation,” ani ng senador.

Noong nakaraang Hulyo, kabilang si Hontiveros sa mga senador na sumuporta sa Senate Resolution No. 768 ni Senator Panfilo Lacson, na nananawagan para imbestigahan ang mga alegasyon na ang mga pampublikong pondo ay ginagastos sa mga troll farm at pekeng social media accounts.

Binigyang-diin ni Hontiveros na dapat may regulatory mechanisms ang mga social media companies na sa ngayon ay bigo sa pagpigil ng pagkalat ng fake news sa kanilang online platforms.

“May responsibilidad ang mga kompanyang ito, at pati na rin tayong mga gumagamit sa websites o apps nila, na tumulong sa pagpigil ng pagkalat ng fake news. Lalo na, tulad ng sinabi ni Maria Ressa sa [speech n'ya sa] Oslo, 'yung stakeholders na kikita sa social media business. They should be accountable,” sabi ni Hontiveros.

Si Hontiveros — ang chairperson of the Senate Committee on Women, Children, Family Relations and Gender Equality — ay nagbanggit ng ilang mga hakbang para panagutin ang mga social media companies. Itong mga hakbang ay nakasaad na rin sa Senate Bill (SB) No. 2209 o ang proposed Special Protections Against Online Sexual Abuse and Exploitation of Children (OSAEC) Law at sa SB No. 2449 o ang Expanded Anti-Trafficking Act of 2021.

“Doon sa anti-OSAEC bill, yung mga social media companies ay talagang dapat ring accountable — whether sa [paggamit sa] online sexual abuse and exploitation o human trafficking. At doon sa anti-trafficking law, ginawa rin naming accountable pati intermediaries, banks and others, na nagiging daluyan nitong dark transactions ng OSAEC and human trafficking at nagiging daluyan ng bayad para sa tao na parang gamit tayo at hindi tao,” paliwanag pa ni Hontiveros at sinabing dapat ito rin ang gawin para sa mga nagpapakalat ng fake news at mga trolls.

Si Hontiveros mismo ay naging target ng fake news na kumukuwestiyon sa kanyang kredibilidad at kinutya sa kanyang mga adbokasiya. Kaya umaasa si Hontiveros na ang susunod na administrasyon ay makakahanap ng mga paraan upang buwagin ang mapang-uyam na operasyong ito dahil ito ay isang pang-aabuso sa kamalayan ng mga mamamayan.

Ang paglaganap ng fake news ay isang global phenomenon, na tinatawag ng United Nations (UN) na “infodemic.” Kasalukuyang humihingi ng tulong ang UN sa mga negosyo, pati na rin ng media at mga mamamahayag, upang labanan ang maling impormasyon — karamihan sa mga ito ay nakatuon sa Covid-19. Sa ngayon, inaprubahan na ng UN ang ilang mga hakbang laban sa fake news sa Africa, India, at Caribbean. Samantala, ang European Union ay gumagawa din ng mga hakbang upang labanan ang fake.

“Kung kayang suportahan ng ibang mga bansa ang mga hakbang laban sa fake news, magagawa rin ito ng Pilipinas.  Hindi natin maaaring payagan na hindi maparusahan ang mga gawaing ito. Gawin natin ang lahat para manaig ang katotohanan,” wika nito. (May karagdagang ulat ang Mindanao Examiner.)