Utos ni Duterte: ‘Dikitan ninyo 'yung mga kaso ni Gordon hanggang election’

IPINAG-UTOS NI Pangulong Duterte sa kanyang Chief Presidential Legal Counsel na si Salvador Panelo na huwag tatantanan si Senador Richard Gordon na siyang chairman ng Blue Ribbon Committee at nagiimbestiga sa deal ng pamahalaan sa Pharmally Pharmaceutical Corp. na nakakuha ng bilyon-bilyong pisong halaga ng kontrata.

“Dikitan ninyo 'yung mga kaso ni Gordon hanggang election, hindi mananalo si Gordon. Sigurado 'yan. Especially if you can file the proper case on time,” ani Duterte na naghahalungkat ng mga isasampang kaso laban sa senador.

 

Kabilang sa mga di-umano’y kaso ang disallowance ng Commission on Audit (COA) ng si Gordon ay chairman pa ng Subic Bay Metropolitan Authority mula 1992-1998, at maging ang Priority Development Assistance Fund ni Gordon noon ay kinuwestyun rin ni Duterte.

“Disallowance is when the notice of disallowance is simply you return the money, but the other side of the picture is that you have committed because you malverse the money, you can go to prison so the other side of that is really malversation. Dikitan ninyo 'yan at hindi aabot ng election time 'yan si Gordon. And if the entire story is narrated to the people, then I am sure that mata sa mata, parang ganoon. So, it is not good to be, mas maganda man ‘yang palabas mo sa publiko na (ma)tigas ka, marunong ka, and that you are very proficient in the English language,” wika pa ni Duterte.

 

Ilang beses ng binatikos at ininsulto at minura ni Duterte si Gordon dahil sa imbestigasyon nito sa Pharmally, ngunit hindi naman nagpapatinag ang senador at tinawag pa nitong “cheap politician” ang Pangulo.

 

Sinabi ni Gordon na hindi ito natatakot kay Duterte at hindi rin titigil sa kanyang imbestigasyon. Suportado ng mga ibang senador si Gordon. (Mindanao Examiner)